'എസ്‌ഐആറിനെക്കുറിച്ചുള്ള ചർച്ചയ്ക്കുള്ള പ്രതിപക്ഷത്തിന്റെ ആവശ്യം നിരാകരിച്ചിട്ടില്ല, പ്രതികരിക്കാൻ ഞങ്ങൾക്ക് സമയം നൽകു': രാജ്യസഭയിൽ കിരൺ റിജിജു

ഡല്‍ഹി: വോട്ടര്‍ പട്ടികയുടെ പ്രത്യേക തീവ്ര പരിഷ്‌കരണം സംബന്ധിച്ച ചര്‍ച്ചയ്ക്കുള്ള പ്രതിപക്ഷത്തിന്റെ ആവശ്യം കേന്ദ്ര സര്‍ക്കാര്‍ നിരസിച്ചിട്ടില്ലെന്നും നിര്‍ദ്ദേശം പരിഗണനയിലാണെന്നും കേന്ദ്ര പാര്‍ലമെന്ററി കാര്യ മന്ത്രി കിരണ്‍ റിജിജു.

എസ്‌ഐആര്‍, തിരഞ്ഞെടുപ്പ് പരിഷ്‌കാരങ്ങള്‍ എന്നിവയെക്കുറിച്ചുള്ള ചര്‍ച്ചയില്‍ 'സമയപരിധിയില്‍ ഒരു നിബന്ധനയും വയ്ക്കരുതെന്ന്' അദ്ദേഹം പ്രതിപക്ഷത്തോട് ആവശ്യപ്പെട്ടു.

പാര്‍ലമെന്റിന്റെ ശീതകാല സമ്മേളനത്തിന്റെ ആദ്യ ദിവസം രാജ്യസഭയില്‍ സംസാരിക്കവെയാണ് റിജിജു ഈ പരാമര്‍ശം നടത്തിയത്. 

'ഇന്നലെയോ ഇന്നോ പ്രതിപക്ഷ പാര്‍ട്ടികള്‍ സര്‍വകക്ഷി യോഗത്തില്‍ കൊണ്ടുവന്ന ഒരു വിഷയത്തെയും ആരും തുരങ്കം വയ്ക്കുന്നില്ല. അത് സര്‍ക്കാരിന്റെ പരിഗണനയിലാണ്.

ഇന്ന് തന്നെ അത് ചര്‍ച്ച ചെയ്യണമെന്ന് നിങ്ങള്‍ ഒരു നിബന്ധന വെച്ചാല്‍ നിങ്ങള്‍ കുറച്ച് സമയം നല്‍കേണ്ടതിനാല്‍ അത് ബുദ്ധിമുട്ടായിരിക്കും,' അരുണാചല്‍ പ്രദേശില്‍ നിന്നുള്ള എംപി ഉപരിസഭയില്‍ പറഞ്ഞു. സര്‍ക്കാരിന് പ്രതികരിക്കാന്‍ കുറച്ച് സമയം നല്‍കണമെന്ന് അദ്ദേഹം പ്രതിപക്ഷത്തോട് ആവശ്യപ്പെട്ടു. 

'എസ്ഐആറുമായി ബന്ധപ്പെട്ടതോ തിരഞ്ഞെടുപ്പ് പരിഷ്‌കാരങ്ങളുമായി ബന്ധപ്പെട്ടതോ ആയ വിഷയത്തില്‍, നിങ്ങള്‍ മുന്നോട്ടുവച്ച ആവശ്യം നിരസിക്കപ്പെട്ടിട്ടില്ല. ഒരു വിഷയത്തിലും ചര്‍ച്ച ചെയ്യാന്‍ സര്‍ക്കാര്‍ തയ്യാറല്ലെന്ന് കരുതരുത്,' അദ്ദേഹം കൂട്ടിച്ചേര്‍ത്തു.