കിഷ്ത്വാറിൽ ഏറ്റുമുട്ടലിൽ ജെയ്‌ഷെ മുഹമ്മദ് ഭീകരർ കുടുങ്ങി

കിഷ്ത്വാര്‍: ജമ്മു കശ്മീരിലെ കിഷ്ത്വാര്‍ ജില്ലയിലെ വനമേഖലയില്‍ ഞായറാഴ്ച സുരക്ഷാ സേനയും ഭീകരരും തമ്മില്‍ ഏറ്റുമുട്ടല്‍ ഉണ്ടായതായി അധികൃതര്‍ അറിയിച്ചു. ഛത്രു മേഖലയിലെ മന്ദ്രല്‍-സിംഗൂറയ്ക്ക് സമീപമുള്ള സോന്നാര്‍ ഗ്രാമത്തില്‍ ആരംഭിച്ച തിരച്ചിലിനിടെ ഉച്ചയോടെയാണ് വെടിവയ്പ്പ് ഉണ്ടായത്. 

തിരച്ചില്‍ സംഘത്തിന് നേരെ തീവ്രവാദികള്‍ വെടിയുതിര്‍ത്തതായും സുരക്ഷാ സേന ഉടന്‍ തിരിച്ചടിച്ചതായും വൃത്തങ്ങള്‍ അറിയിച്ചു.

വെടിവയ്പ്പിനെത്തുടര്‍ന്ന്, പ്രദേശം മുഴുവന്‍ വളയുകയും, ഓപ്പറേഷന്‍ ശക്തിപ്പെടുത്തുന്നതിനായി കൂടുതല്‍ സേനയെ സ്ഥലത്തേക്ക് വിന്യസിക്കുകയും ചെയ്തു. ഇടതൂര്‍ന്ന വനമേഖലയില്‍ നിലവില്‍ തിരച്ചില്‍ പ്രവര്‍ത്തനം പുരോഗമിക്കുകയാണ്.