ലഖിംപൂർ ഖേരിയിലെ ധഖേർവ ഗിരിജാപുരി ഹൈവേയിൽ കാർ കനാലിലേക്ക് മറിഞ്ഞ് അഞ്ച് മരണം

ലഖിംപൂര്‍ ഖേരി: ഉത്തര്‍പ്രദേശിലെ ലഖിംപൂര്‍ ഖേരിയിലെ ധഖേര്‍വ-ഗിരിജാപുരി ഹൈവേയില്‍ അമിതവേഗതയില്‍ വന്ന കാര്‍ നിയന്ത്രണം വിട്ട് ശാരദ കനാലിലേക്ക് മറിഞ്ഞു. അപകടത്തില്‍ അഞ്ച് പേര്‍ കൊല്ലപ്പെടുകയും ഒരാള്‍ക്ക് പരിക്കേല്‍ക്കുകയും ചെയ്തു.

ചൊവ്വാഴ്ച രാത്രിയാണ് കാര്‍ അപകടത്തില്‍പ്പെട്ടത്. സംഭവമറിഞ്ഞ് പ്രാദേശിക പോലീസും നാട്ടുകാരും സ്ഥലത്തെത്തി. ഗ്രാമവാസികളുടെ സഹായത്തോടെ രക്ഷാപ്രവര്‍ത്തകര്‍ നടത്തിയ ശ്രമകരമായ പ്രവര്‍ത്തനത്തിനൊടുവില്‍ വാഹനം കനാലില്‍ നിന്ന് പുറത്തെടുത്തു. 

അഞ്ച് യാത്രക്കാരെ മരിച്ച നിലയില്‍ കണ്ടെത്തി, പരിക്കേറ്റയാളെ ചികിത്സയ്ക്കായി സിഎച്ച്‌സി റാമിയ ബെഹ്റാദ് ആശുപത്രിയിലേക്ക് കൊണ്ടുപോയി.

മരിച്ചവരുടെ കുടുംബങ്ങള്‍ക്ക് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് അനുശോചനം രേഖപ്പെടുത്തി. പരിക്കേറ്റവര്‍ക്ക് ഉചിതമായ വൈദ്യസഹായം നല്‍കാന്‍ ഉത്തരവിട്ടു.

ദുരിതാശ്വാസ പ്രവര്‍ത്തനങ്ങള്‍ വേഗത്തിലാക്കാനും അപകടസ്ഥലത്ത് ആവശ്യമായ എല്ലാ സഹായങ്ങളും ഉടന്‍ എത്തിക്കുന്നുണ്ടെന്ന് ഉറപ്പാക്കാനും അദ്ദേഹം പ്രാദേശിക ഭരണകൂടത്തോട് നിര്‍ദ്ദേശിച്ചു.