ഡാർജിലിംഗിൽ കനത്ത മഴയിൽ മണ്ണിടിച്ചിലിൽ ഏഴ് പേർ മരിച്ചു, റോഡുകൾ തടസ്സപ്പെട്ടു; ഇരുമ്പ് പാലം തകർന്നു

ഡാര്‍ജിലിംഗ്: പശ്ചിമ ബംഗാളിലെ ഡാര്‍ജിലിംഗ് ജില്ലയില്‍ ശനിയാഴ്ച വൈകുന്നേരം മുതല്‍ തുടര്‍ച്ചയായി പെയ്യുന്ന കനത്ത മഴയെ തുടര്‍ന്ന് മിരിക്കിനടുത്തുള്ള ജാസ്ബീര്‍ ഗ്രാമത്തില്‍ മണ്ണിടിഞ്ഞുവീണ് ഏഴ് പേര്‍ മരിച്ചു. കൂടാതെ, മിരിക്ക്, കുര്‍സിയോങ് എന്നീ പട്ടണങ്ങളെയും വിനോദസഞ്ചാര കേന്ദ്രങ്ങളെയും ബന്ധിപ്പിക്കുന്ന ഇരുമ്പ് പാലം തുടര്‍ച്ചയായ മഴയെത്തുടര്‍ന്ന് തകര്‍ന്നു.

'ഏഴു മൃതദേഹങ്ങള്‍ ഇതിനകം അവശിഷ്ടങ്ങളില്‍ നിന്ന് കണ്ടെടുത്തിട്ടുണ്ട്. രണ്ട് പേരെക്കുറിച്ച് ഞങ്ങള്‍ക്ക് വിവരങ്ങള്‍ ലഭിച്ചു. അവരുടെ മൃതദേഹങ്ങള്‍ കൂടി കണ്ടെത്താനുള്ള പ്രവര്‍ത്തനങ്ങള്‍ പുരോഗമിക്കുകയാണ്.

ഡാര്‍ജിലിംഗിലേക്ക് പോകുന്ന കുര്‍സിയോങ് റോഡിലെ ദിലാറാമില്‍ മണ്ണിടിച്ചില്‍ ഉണ്ടായി,' ഡാര്‍ജിലിംഗ് ജില്ലാ പോലീസ് അഡീഷണല്‍ എസ്പി കുര്‍സിയോങ് അഭിഷേക് റോയ് പറഞ്ഞു.

ഡാര്‍ജിലിംഗിനെയും കലിംപോങ്ങിനെയും കനത്ത മഴ സാരമായി ബാധിച്ചു. ശനിയാഴ്ച രാത്രി മുതല്‍ വടക്കന്‍ ബംഗാളില്‍ കനത്ത മഴ പെയ്യുന്നുണ്ടെന്ന് കാലാവസ്ഥാ വകുപ്പ് അറിയിച്ചു. ദുരിതബാധിത പ്രദേശങ്ങളില്‍ തദ്ദേശ സ്വയംഭരണ സ്ഥാപനങ്ങളും ദുരന്ത നിവാരണ സേനയും രക്ഷാപ്രവര്‍ത്തനങ്ങള്‍ നടത്തുന്നുണ്ട്.

തുടര്‍ച്ചയായ മഴ കാരണം മണ്ണുമാന്തി യന്ത്രങ്ങള്‍ക്കും അടിയന്തര വാഹനങ്ങള്‍ക്കും സ്ഥലത്ത് എത്താന്‍ ബുദ്ധിമുട്ടാണെന്ന് ഉദ്യോഗസ്ഥര്‍ പറഞ്ഞു.

'ഭൂപ്രദേശം വഴുക്കലുള്ളതാണ്, നിരവധി വീടുകള്‍ക്ക് കേടുപാടുകള്‍ സംഭവിച്ചതായി റിപ്പോര്‍ട്ടുണ്ട്. നാശനഷ്ടത്തിന്റെ വ്യാപ്തി ഇതുവരെ കണ്ടെത്തിയിട്ടില്ല,' അദ്ദേഹം പറഞ്ഞു.

മിരിക്-സുഖിയപോഖ്രി റോഡിലെ ഒരു കുന്നിന്‍ ചരിവിനടുത്താണ് മണ്ണിടിച്ചില്‍ ഉണ്ടായതെന്ന് പ്രാഥമിക വിവരം. ഇത് വാഹനങ്ങളുടെ ഗതാഗതത്തെയും സമീപ പ്രദേശങ്ങളിലേക്കുള്ള ആശയവിനിമയ ബന്ധങ്ങളെയും തടസ്സപ്പെടുത്തി.