ഹിമാചൽ, ഉത്തരാഖണ്ഡ് സംസ്ഥാനങ്ങളിൽ ഉരുൾപൊട്ടലും മണ്ണിടിച്ചിലും തുടരുന്നു; സ്കൂളുകൾക്ക് അവധി

ഡല്‍ഹി: ഹിമാചല്‍ പ്രദേശിലും ഉത്തരാഖണ്ഡിലും തുടരുന്ന കനത്ത മഴയെ തുടര്‍ന്ന് സംസ്ഥാനങ്ങളിലെ പല ജില്ലകളിലും കേന്ദ്ര കാലാവസ്ഥാ വകുപ്പ് റെഡ് അലര്‍ട്ട് പ്രഖ്യാപിച്ചു.

മാണ്ഡി ജില്ലയില്‍ ബിയാസ് നദി കരകവിഞ്ഞൊഴുകിയതിനെ തുടര്‍ന്ന് വെള്ളപ്പൊക്കം രൂക്ഷമായിരിക്കുകയാണ്. ചൊവ്വാഴ്ചയും അതിതീവ്ര മഴയ്ക്ക് റെഡ് അലര്‍ട്ട് നിലനില്‍ക്കുമെന്ന് അധികൃതര്‍ അറിയിച്ചു.

മണ്ഡി-മണാലി ഭാഗത്തുള്ള ചണ്ഡീഗഢ്-മണാലി ഹൈവേയില്‍ നിരവധി മണ്ണിടിച്ചിലുകള്‍ റിപ്പോര്‍ട്ട് ചെയ്തിട്ടുണ്ട്, ഇതു ഗതാഗതം തടസ്സപ്പെടുത്തുകയും നിരവധി പ്രദേശങ്ങള്‍ പുറംലോകവുമായി ബന്ധം നഷ്ടപ്പെടുകയും ചെയ്തു.

സുരക്ഷാ കാരണങ്ങളാല്‍, മാണ്ഡി ജില്ലയിലെയും കാംഗ്ര, സിര്‍മൗര്‍, സോളന്‍ ജില്ലകളിലെയും എല്ലാ വിദ്യാഭ്യാസ സ്ഥാപനങ്ങളും ചൊവ്വാഴ്ച അടച്ചിടാന്‍ ഉത്തരവിട്ടിട്ടുണ്ട്.

കഴിഞ്ഞ 24 മണിക്കൂറിനിടെ സംസ്ഥാനത്ത് മൂന്ന് പേര്‍ കൂടി മഴയുമായി ബന്ധപ്പെട്ട് മരിച്ചു. ഇതോടെ ഈ വര്‍ഷം മഴക്കെടുതിയില്‍ മരിച്ചവരുടെ എണ്ണം 23 ആയി.

മണ്ഡി, സിര്‍മൗര്‍ ജില്ലകളിലടക്കം 250-ലധികം റോഡുകള്‍ മൂടല്‍മഞ്ഞും മണ്ണിടിച്ചിലുകളും വെള്ളപ്പൊക്കവും മൂലം അടച്ചിട്ടിരിക്കുകയാണ്. വൈദ്യുതി, കുടിവെള്ള വിതരണ സംവിധാനങ്ങള്‍ ഉള്‍പ്പെടെ നിരവധി അടിസ്ഥാന സൗകര്യങ്ങള്‍ തടസ്സപ്പെട്ടിട്ടുണ്ട്.

ഹിമാചല്‍ പ്രദേശിലും ഉത്തരാഖണ്ഡിലും അടുത്ത ദിവസങ്ങളിലും കനത്ത മഴ തുടരുമെന്ന് കാലാവസ്ഥാ വകുപ്പ് മുന്നറിയിപ്പ് നല്‍കിയിട്ടുണ്ട്.