ഈ ഭൂമിയില്‍ നിങ്ങളുടെ ആയുസ് ഇനി 24 മണിക്കൂര്‍ മാത്രം! പപ്പു യാദവ് എംപിക്ക് വധഭീഷണിയുമായി ലോറന്‍സ് ബിഷ്ണോയ് സംഘം

ഡല്‍ഹി: പൂര്‍ണ എംപി പപ്പു യാദവിന് വീണ്ടും വധഭീഷണി. ഇത്തവണ ഭീഷണി മുഴക്കിയ ആള്‍ 24 മണിക്കൂറിന്റെ അന്ത്യശാസനമാണ് നല്‍കിയിരിക്കുന്നത്. വാട്സ്ആപ്പ് സന്ദേശത്തിലൂടെയാണ് ഭീഷണി. 

'പപ്പു യാദവ് നിങ്ങള്‍ക്ക് ഇനി 24 മണിക്കൂര്‍ മാത്രമേ ആയുസ് ഉള്ളൂ' എന്നാണ് ഭീഷണി. ഒരു സ്ഫോടനത്തിന്റെ വീഡിയോയും പപ്പു യാദവിന് വാട്സ്ആപ്പില്‍ സംഘം അയച്ചിട്ടുണ്ട്. '24 മണിക്കൂറിനുള്ളില്‍ നിങ്ങള്‍ കൊല്ലപ്പെടും' എന്നാണ് സന്ദേശം. 

ഞങ്ങളുടെ തയ്യാറെടുപ്പ് പൂര്‍ത്തിയായി. ഞങ്ങള്‍ നിങ്ങളുടെ അടുത്ത് എത്തിയിരിക്കുന്നു. നിങ്ങളുടെ അംഗരക്ഷകര്‍ക്ക് പോലും നിങ്ങളെ രക്ഷിക്കാന്‍ കഴിയില്ല. നിങ്ങളുടെ അവസാന ദിനം ആസ്വദിക്കൂ' എന്നുള്ള സന്ദേശത്തില്‍ 'ഹാപ്പി ബര്‍ത്ത്ഡേ ലോറന്‍സ് ഭായ്' എന്നും കുറിച്ചിട്ടുണ്ട്.

ബാബ സിദ്ദിഖ് വധത്തിന് പിന്നാലെ തനിക്ക് അനുമതി നല്‍കിയാല്‍ 24 മണിക്കൂറിനുള്ളില്‍ താന്‍ ലോറന്‍സ് സംഘത്തെ നശിപ്പിക്കുമെന്ന് പപ്പു യാദവ് പറഞ്ഞിരുന്നു. അന്നുമുതല്‍ പപ്പു യാദവിന് നിരന്തരം ഭീഷണികള്‍ വരുന്നുണ്ട്. 

അതേസമയം ഭീഷണികള്‍ കണക്കിലെടുത്ത് പപ്പു യാദവിന്റെ അടുത്ത സുഹൃത്ത് അദ്ദേഹത്തിന് ബുള്ളറ്റ് പ്രൂഫ് ലാന്‍ഡ് ക്രൂയിസര്‍ സമ്മാനിച്ചിരുന്നു. ഒരു റോക്കറ്റ് ലോഞ്ചര്‍ ഈ ബുള്ളറ്റ് പ്രൂഫ് കാറില്‍ ഇടിച്ചാലും ഒന്നും സംഭവിക്കില്ലെന്നാണ് അവകാശവാദം.