ഹിമാചൽ പ്രദേശിൽ പുള്ളിപ്പുലി ഗ്രാമീണരെ ആക്രമിച്ചു; വനപാലകർ വെടിവെച്ച് പിടികൂടി

ഡല്‍ഹി: ഹിമാചല്‍ പ്രദേശിലെ ഊന ജില്ലയിലെ പലക്വാഹ് ഗ്രാമത്തില്‍ ഒരു പുള്ളിപ്പുലി ഗ്രാമീണരെ ആക്രമിച്ചു.

തിങ്കളാഴ്ച പലക്വാഹിലെ വയലുകളില്‍ ജോലി ചെയ്യുന്ന ആളുകളെ പുള്ളിപ്പുലി ആക്രമിച്ചതിനെത്തുടര്‍ന്ന്, ഗ്രാമവാസികള്‍ ഒത്തുചേര്‍ന്ന് വടികളും കമ്പുകളും ഉപയോഗിച്ച് പുള്ളിപ്പുലിയെ ആക്രമിക്കാന്‍ തുടങ്ങി. 

ഗ്രാമവാസികളുടെ തിരിച്ചടിയില്‍ പുള്ളിപ്പുലിയും രണ്ട് ഗ്രാമവാസികളെ ആക്രമിക്കാന്‍ ശ്രമിച്ചു. ആക്രമണത്തില്‍ ഒരു ഗ്രാമവാസിയുടെ ചെവിക്കും മറ്റൊരാളുടെ കാലിനും പരിക്കേറ്റു. ഗ്രാമവാസികളുടെ ആക്രമണത്തില്‍ നിന്ന് രക്ഷപ്പെട്ട പുള്ളിപ്പുലി ഗ്രാമത്തിലെ ഒരു വീടിന്റെ മതിലിനുള്ളില്‍ ഒളിച്ചിരുന്നു. 

ഉടന്‍ സ്ഥലത്തെത്തിയ വനംവകുപ്പ് ഉദ്യോഗസ്ഥര്‍ മറ്റൊരു വഴിയിലൂടെ വീടിനുള്ളില്‍ പ്രവേശിച്ച് പുള്ളിപ്പുലിയെ മുറിയില്‍ നിന്ന് പുറത്തെത്തിച്ച് ജനലിന്റെ അടുത്തേക്ക് വിളിച്ചു.

അതിനുശേഷം നേരത്തെ തയ്യാറാക്കിയ ഇന്‍ജക്ഷന്‍ ഫയര്‍ ചെയ്ത് പുള്ളിപ്പുലിയുടെ ശരീരത്തില്‍ പ്രവേശിപ്പിച്ചു. ഇതോടെ പുള്ളിപ്പുലി ബോധരഹിതനായി. പിന്നീട് ഉദ്യോഗസ്ഥര്‍ ബോധരഹിതനായ പുള്ളിപ്പുലിയെ പിടികൂടുകയായിരുന്നു.