പാക് ഭീകര ക്യാമ്പുകളില്‍ ഇന്ത്യ നടത്തിയ ആക്രമണത്തിന് പിന്നാലെ നിയന്ത്രണ രേഖയില്‍ പാക് വെടിവയ്പ്പും ഷെല്ലാക്രമണവും. മൂന്ന് ഇന്ത്യക്കാര്‍ കൊല്ലപ്പെട്ടു. എല്‍ഒസിയില്‍ സംഘര്‍ഷം രൂക്ഷമാകുന്നു

ഡല്‍ഹി: പാക് ഭീകര ക്യാമ്പുകളില്‍ ഇന്ത്യ നടത്തിയ ആക്രമണത്തിന് പിന്നാലെ നിയന്ത്രണ രേഖയില്‍ വെടിവയ്പ്പും ഷെല്ലാക്രമണവും നടത്തി പാകിസ്ഥാന്‍. ആക്രമണത്തില്‍ മൂന്ന് ഇന്ത്യക്കാര്‍ കൊല്ലപ്പെട്ടതോടെ എല്‍ഒസിയില്‍ സംഘര്‍ഷം രൂക്ഷമാകുകയാണ്.

ഏപ്രില്‍ 22 ന് പഹല്‍ഗാമില്‍ നടന്ന ആക്രമണത്തിന് മറുപടിയായി ഇന്ത്യ നടത്തിയ 'ഓപ്പറേഷന്‍ സിന്ദൂര്‍' എന്ന പ്രതികാര നടപടിക്ക് മണിക്കൂറുകള്‍ക്ക് ശേഷമാണ് സംഭവം.

വെടിവയ്പ്പിലും ഷെല്ലാക്രമണത്തിലും മൂന്ന് നിരപരാധികളായ സാധാരണക്കാര്‍ക്ക് ജീവന്‍ നഷ്ടപ്പെട്ടു. ഇന്ത്യന്‍ സൈന്യം ആനുപാതികമായ രീതിയില്‍ മറുപടി നല്‍കുന്നുണ്ടെന്ന് സൈന്യം പ്രസ്താവനയില്‍ പറഞ്ഞു. നിയന്ത്രണ രേഖയില്‍ ഇപ്പോഴും കനത്ത പീരങ്കി ഷെല്ലാക്രമണം തുടരുകയാണ്.

പാകിസ്ഥാന്‍ സൈന്യം പീരങ്കി തോക്കുകള്‍ ഉപയോഗിച്ച് നടത്തിയ വെടിവയ്പ്പിനോട് സൈന്യം വളരെ ഫലപ്രദമായി പ്രതികരിച്ചതായി പ്രതിരോധ വൃത്തങ്ങളെ ഉദ്ധരിച്ച് വാര്‍ത്താ ഏജന്‍സിയായ എഎന്‍ഐ റിപ്പോര്‍ട്ട് ചെയ്തു.

ഇന്ത്യയുടെ തിരിച്ചടിയില്‍ പാകിസ്ഥാന്‍ സൈന്യത്തിന് നാശനഷ്ടങ്ങള്‍ സംഭവിച്ചതായും റിപ്പോര്‍ട്ട് കൂട്ടിച്ചേര്‍ത്തു.