ഗവർണർ ബിൽ പാസാക്കി. ഉത്തരാഖണ്ഡ് മദ്രസ ബോർഡ് പിരിച്ചുവിടും

ഡെറാഡൂണ്‍: ന്യൂനപക്ഷ വിദ്യാഭ്യാസ സ്ഥാപനങ്ങളെ മുഖ്യധാരാ വിദ്യാഭ്യാസ സമ്പ്രദായത്തിലേക്ക് സംയോജിപ്പിക്കുന്നതിനുള്ള ശ്രമത്തിന്റെ ഭാഗമായി, ഉത്തരാഖണ്ഡ് ഗവര്‍ണര്‍ ലഫ്റ്റനന്റ് ജനറല്‍ ഗുര്‍മിത് സിംഗ് (റിട്ട.) തിങ്കളാഴ്ച 2025 ലെ ഉത്തരാഖണ്ഡ് ന്യൂനപക്ഷ വിദ്യാഭ്യാസ ബില്‍ അംഗീകരിച്ചു. 

ഈ നീക്കം നടപ്പിലാക്കിക്കഴിഞ്ഞാല്‍ മദ്രസ ബോര്‍ഡ് നിര്‍ത്തലാക്കും, കൂടാതെ സംസ്ഥാനത്ത് പ്രവര്‍ത്തിക്കുന്ന എല്ലാ മദ്രസകളും ഉത്തരാഖണ്ഡ് ന്യൂനപക്ഷ വിദ്യാഭ്യാസ അതോറിറ്റിയുടെ അംഗീകാരം നേടുകയും ഉത്തരാഖണ്ഡ് സ്‌കൂള്‍ വിദ്യാഭ്യാസ ബോര്‍ഡുമായി അഫിലിയേറ്റ് ചെയ്യുകയും വേണം.

ബില്‍ അംഗീകരിച്ചതിന് ഗവര്‍ണര്‍ സിങ്ങിനെ ഉത്തരാഖണ്ഡ് മുഖ്യമന്ത്രി പുഷ്‌കര്‍ സിംഗ് ധാമി പ്രശംസിച്ചു. പുതിയ നിയമം സംസ്ഥാന വിദ്യാഭ്യാസ സമ്പ്രദായത്തെ സുതാര്യവും ഉത്തരവാദിത്തമുള്ളതും ഗുണമേന്മയുള്ളതുമാക്കുമെന്ന് അദ്ദേഹം പറഞ്ഞു.

'ബഹുമാനപ്പെട്ട ഗവര്‍ണറുടെ അംഗീകാരത്തോടെ, ഈ ബില്‍ നിയമമാകാനുള്ള വഴി തുറന്നിരിക്കുന്നു. ഈ നിയമപ്രകാരം, ന്യൂനപക്ഷ സമുദായങ്ങളുടെ വിദ്യാഭ്യാസ സമ്പ്രദായത്തിനായി ഒരു അതോറിറ്റി സ്ഥാപിക്കപ്പെടും, അത് ന്യൂനപക്ഷ വിദ്യാഭ്യാസ സ്ഥാപനങ്ങള്‍ക്ക് അംഗീകാരം നല്‍കുന്ന ചുമതല കൈകാര്യം ചെയ്യും.

കൂടാതെ, ഈ ബില്‍ നടപ്പിലാക്കിയതിനുശേഷം, മദ്രസകള്‍ പോലുള്ള ന്യൂനപക്ഷ വിദ്യാഭ്യാസ സ്ഥാപനങ്ങള്‍ ഉത്തരാഖണ്ഡ് വിദ്യാഭ്യാസ ബോര്‍ഡില്‍ നിന്ന് അംഗീകാരം നേടേണ്ടതുണ്ട്,' ധാമി എക്സില്‍ പോസ്റ്റ് ചെയ്തു.

സംസ്ഥാന നിയമസഭയില്‍ നിന്ന് ബില്ലിന് അംഗീകാരം ലഭിച്ചുകഴിഞ്ഞാല്‍, മദ്രസ ബോര്‍ഡ് പിരിച്ചുവിടുന്ന രാജ്യത്തെ ആദ്യത്തെ സംസ്ഥാനമായി ഉത്തരാഖണ്ഡ് മാറും.

ന്യൂനപക്ഷ സ്ഥാപനങ്ങളെ മുഖ്യധാരാ വിദ്യാഭ്യാസ ചട്ടക്കൂടിലേക്ക് കൊണ്ടുവരുന്നതിനും അവയില്‍ ഗുണനിലവാരമുള്ള വിദ്യാഭ്യാസം ഉറപ്പാക്കുന്നതിനുമുള്ള സര്‍ക്കാരിന്റെ ശ്രമങ്ങളുടെ ഭാഗമായിരുന്നു ബില്‍ എന്ന് മുഖ്യമന്ത്രിയുടെ ഓഫീസില്‍ നിന്നുള്ള പത്രക്കുറിപ്പില്‍ പറയുന്നു.