'പ്രണയം അനശ്വരമാണ്': അച്ഛനും സഹോദരന്മാരും കാമുകനെ കൊലപ്പെടുത്തി. പിന്നാലെ കാമുകന്റെ മൃതദേഹത്തെ 'വിവാഹം ' കഴിച്ച് യുവതി

നാന്ദേഡ്: മഹാരാഷ്ട്രയിലെ നന്ദേഡ് ജില്ലയില്‍ 20 വയസ്സുള്ള യുവാവ് ക്രൂരമായി കൊല്ലപ്പെട്ടു. യുവാവിന്റെ 21 വയസ്സുള്ള കാമുകി ശവസംസ്‌കാര ചടങ്ങിനിടെ നെറ്റിയില്‍ സിന്ദൂരം ചാര്‍ത്തി കാമുകന്റെ മൃതദേഹത്തെ വിവാഹം കഴിച്ച് 'പ്രണയം അനശ്വരമാണ്' എന്ന് തെളിയിച്ചു.

സാക്ഷാം ടേറ്റ്, ആഞ്ചല്‍ മാമിദ്വാര്‍ എന്നിവരാണ് കമിതാക്കളെന്ന് തിരിച്ചറിഞ്ഞു. ആഞ്ചലിന്റെ സഹോദരന്മാര്‍ വഴിയാണ് ഇരുവരും പരിചയപ്പെട്ടത്, കഴിഞ്ഞ മൂന്ന് വര്‍ഷമായി പ്രണയത്തിലായിരുന്നു. എന്നാല്‍, വ്യത്യസ്ത ജാതികളില്‍പ്പെട്ടവരായതിനാല്‍ ആഞ്ചലിന്റെ കുടുംബം ഈ ബന്ധത്തിന് എതിരായിരുന്നു.

വ്യാഴാഴ്ച സാക്ഷാമും ആഞ്ചലിന്റെ സഹോദരന്‍ ഹിമേഷ് മാമിദ്വാറും തമ്മില്‍ വഴക്കുണ്ടായി. വഴക്കിനിടെ, ഹിമേഷ് സാക്ഷാമിനെ വെടിവച്ചു, ഒരു വെടിയുണ്ട അദ്ദേഹത്തിന്റെ വാരിയെല്ലുകളില്‍ തുളച്ചുകയറി. പിന്നീട് അയാള്‍ സാക്ഷാമിന്റെ തലയില്‍ അടിച്ചു. അതോടെ യുവാവ് തല്‍ക്ഷണം മരിച്ചു.

സാക്ഷാമിന്റെ കൊലപാതകത്തിന് ശേഷം, വെള്ളിയാഴ്ച വൈകുന്നേരം ആഞ്ചല്‍ കാമുകന്റെ വീട്ടിലേക്ക് പോയി. കുടുംബാംഗങ്ങള്‍ അദ്ദേഹത്തിന്റെ ശവസംസ്‌കാരത്തിനുള്ള ഒരുക്കങ്ങള്‍ നടത്തുകയായിരുന്നു. സന്ദര്‍ശന വേളയില്‍, ആഞ്ചല്‍ സാക്ഷാമിന്റെ ശരീരത്തില്‍ സിന്ദൂരം പൂശി 'വിവാഹം കഴിച്ചു'. അവരുടെ പ്രണയം 'അനശ്വരമാണ്' എന്ന് അവകാശപ്പെട്ടു. 

തന്റെ പിതാവിനും സഹോദരന്മാര്‍ക്കും വധശിക്ഷ നല്‍കണമെന്ന് ആഞ്ചല്‍ ആവശ്യപ്പെടുന്നു, കൂടാതെ സാക്ഷാമിന്റെ വീട്ടില്‍ താമസിക്കാന്‍ പദ്ധതിയിട്ടിട്ടുണ്ടെന്നും അവര്‍ പറഞ്ഞു. 

'കഴിഞ്ഞ മൂന്ന് വര്‍ഷമായി ഞാന്‍ സാക്ഷാമുമായി പ്രണയത്തിലായിരുന്നു, പക്ഷേ ജാതി വ്യത്യാസത്തിന്റെ പേരില്‍ അച്ഛന്‍ ഞങ്ങളുടെ ബന്ധത്തെ എതിര്‍ത്തു. എന്റെ കുടുംബം പലപ്പോഴും സാക്ഷാമിനെ കൊല്ലുമെന്ന് ഭീഷണിപ്പെടുത്തി, ഇപ്പോള്‍ എന്റെ അച്ഛനും സഹോദരന്മാരായ ഹിമേഷും സാഹിലും അത് ചെയ്തു. എനിക്ക് നീതി വേണം. പ്രതികളെ തൂക്കിക്കൊല്ലണമെന്ന് ഞാന്‍ ആഗ്രഹിക്കുന്നു. യുവതി പ്‌റഞ്ഞു.