മഹാരാഷ്ട്രയിലെ മഹാസഖ്യ സര്‍ക്കാരില്‍ മന്ത്രിമാരുടെ വകുപ്പുകള്‍ വിഭജിച്ചു. ആഭ്യന്തരവകുപ്പ് ഉള്‍പ്പെടെ നാല് വകുപ്പുകള്‍ ദേവേന്ദ്ര ഫഡ്നാവിസ് കൈകാര്യം ചെയ്യും. ഏകനാഥ് ഷിന്‍ഡെയ്ക്ക് നഗരവികസന വകുപ്പ്. കഴിഞ്ഞ തവണത്തെ പോലെ ഇത്തവണയും ധനവകുപ്പ് അജിത് പവാറിന് തന്നെ

മുംബൈ:  മഹാരാഷ്ട്രയിലെ മഹാസഖ്യ സര്‍ക്കാരില്‍ മന്ത്രിമാരുടെ വകുപ്പുകള്‍ വിഭജിച്ചു. മുന്‍ മുഖ്യമന്ത്രിയായിരുന്ന ഏക്നാഥ് ഷിന്‍ഡെ ആഗ്രഹിച്ച ആഭ്യന്തരവകുപ്പ് മുഖ്യമന്ത്രി ദേവേന്ദ്ര ഫഡ്നാവിസാണ് കൈകാര്യം ചെയ്യുക. 

ആഭ്യന്തരത്തിനൊപ്പം മറ്റ് 4 വകുപ്പുകളും ദേവേന്ദ്ര ഫഡ്നാവിസ് കൈകാര്യം ചെയ്യും. ഏകനാഥ് ഷിന്‍ഡെയ്ക്ക് നഗരവികസന വകുപ്പ് ലഭിച്ചു. അതേ സമയം കഴിഞ്ഞ തവണത്തെ പോലെ ഇത്തവണയും അജിത് പവാറിനാണ് ധനവകുപ്പ്

ആഭ്യന്തര മന്ത്രാലയത്തിന് പുറമേ ഊര്‍ജ്ജ വകുപ്പ്, നിയമവും ജുഡീഷ്യറിയും, പൊതുഭരണ വകുപ്പ്, ഇന്‍ഫര്‍മേഷന്‍ ആന്‍ഡ് പബ്ലിസിറ്റി വകുപ്പ് എന്നിവയും ദേവേന്ദ്ര ഫഡ്നാവിസ് കൈകാര്യം ചെയ്യുന്നു. 

അതേസമയം ഏറെക്കാലമായി ആഭ്യന്തര മന്ത്രാലയത്തില്‍ അവകാശവാദം ഉന്നയിക്കുന്ന ഉപമുഖ്യമന്ത്രി ഏകനാഥ് ഷിന്‍ഡെയ്ക്ക് നഗരവികസനത്തിന് പുറമെ പാര്‍പ്പിടം, പൊതുമരാമത്ത് തുടങ്ങിയ രണ്ട് സുപ്രധാന വകുപ്പുകള്‍ കൂടി ലഭിച്ചിട്ടുണ്ട്.

രണ്ടാം ഉപമുഖ്യമന്ത്രി അജിത് പവാര്‍ ധനകാര്യ വകുപ്പിനൊപ്പം ആസൂത്രണ, സംസ്ഥാന എക്‌സൈസ് വകുപ്പും കൈകാര്യം ചെയ്യും

സംസ്ഥാന നിയമസഭയുടെ ഒരാഴ്ച നീണ്ടുനില്‍ക്കുന്ന ശീതകാല സമ്മേളനം അവസാനിച്ച് മണിക്കൂറുകള്‍ കഴിഞ്ഞും മഹാരാഷ്ട്ര നിയമസഭാ തിരഞ്ഞെടുപ്പ് ഫലം പ്രഖ്യാപിച്ച് ഏകദേശം ഒരു മാസത്തിനുശേഷവുമാണ് വകുപ്പുകളുടെ ഈ വിഭജനം നടന്നത്. 

ശീതകാല സമ്മേളനത്തിന് ഒരു ദിവസം മുമ്പ് ഡിസംബര്‍ 15 നാണ് 39 മന്ത്രിമാരുടെ പേരുകള്‍ പ്രഖ്യാപിച്ചത്.