മഹായുതിയില്‍ വീണ്ടും തര്‍ക്കം, മന്ത്രി സ്ഥാനത്തിനു വേണ്ടിയുള്ള പോരാട്ടം രൂക്ഷമാകുന്നു, എന്‍സിപി നേതാവിനെ ഔറംഗസേബിനോട് താരതമ്യം ചെയ്ത് ശിവസേന എംഎല്‍എ

മുംബൈ: മഹാരാഷ്ട്രയില്‍ റായ്ഗഡിന്റെ ചുമതലയുള്ള മന്ത്രി സ്ഥാനത്തെച്ചൊല്ലി ഇരു പാര്‍ട്ടികളും തമ്മിലുള്ള വിള്ളല്‍ വര്‍ദ്ധിച്ചുവരുന്നതായി സൂചന.

ശിവസേന എംഎല്‍എ മഹേന്ദ്ര തോര്‍വ് നാഷണലിസ്റ്റ് കോണ്‍ഗ്രസ് പാര്‍ട്ടി (എന്‍സിപി) എംപി സുനില്‍ തത്കറെയെ മുഗള്‍ ചക്രവര്‍ത്തി ഔറംഗസേബിനോട് താരതമ്യം ചെയ്തതോടെയാണ് വിവാദം ആരംഭിച്ചത്

റായ്ഗഡിന്റെ ചുമതലയുള്ള മന്ത്രിസ്ഥാനത്തെ കുറിച്ചുളള തീരുമാനം സ്റ്റേ ചെയ്തത് തെറ്റായിരുന്നു എന്ന് ബുധനാഴ്ച അലിബാഗില്‍ നടന്ന ഒരു പരിപാടിയില്‍ റായ്ഗഡ് എംഎല്‍എ തോര്‍വ് പറഞ്ഞു. 

റായ്ഗഡിന്റെ ചുമതലയുള്ള മന്ത്രി സ്ഥാനത്തേക്ക് എന്‍സിപിയും ശിവസേനയും മത്സരിക്കുന്നുണ്ട്. വനിതാ-ശിശു വികസന മന്ത്രിയും എന്‍സിപി നേതാവുമായ അദിതി തത്കറെയെ ജില്ലയുടെ ചുമതലയുള്ള മന്ത്രിയായി ഫഡ്നാവിസ് നിയമിച്ചിരുന്നു.

എന്നാല്‍, റായ്ഗഡില്‍ മഹാദിനെ പ്രതിനിധീകരിക്കുന്ന മന്ത്രി ഭരത് ഗൊഗാവാലെയും ജില്ലയുടെ ചുമതലയുള്ള മന്ത്രിയാകാന്‍ ആഗ്രഹിച്ചു. ശിവസേനയുടെ അതൃപ്തിയെത്തുടര്‍ന്ന്, ഫഡ്നാവിസ് തീരുമാനം സ്റ്റേ ചെയ്തു.

നിങ്ങളുടെ സഹപ്രവര്‍ത്തകര്‍ നിങ്ങളെ ക്യാപ്റ്റനാക്കിയതിനാല്‍ സുനില്‍ തത്കറെയ്ക്ക് ഉചിതമായ സ്ഥാനം ലഭിക്കുമെന്ന് മഹേന്ദ്ര തോര്‍വ് പറഞ്ഞു. ശിവസേനയുമായി തത്കറെ തെറ്റായ രാഷ്ട്രീയം കളിച്ചാല്‍ അടുത്ത തവണ ശിവസേനയ്ക്ക് റായ്ഗഡില്‍ നിന്ന് ലോക്സഭാ തെരഞ്ഞെടുപ്പില്‍ മത്സരിക്കാമെന്നും തോര്‍വ് പറഞ്ഞു. 

ഞങ്ങളുടെ എംഎല്‍എമാരുടെ പിന്തുണ കൊണ്ടാണു നിങ്ങള്‍ റായ്ഗഡിന്റെ എംപിയായതെന്നും അല്ലാത്തപക്ഷം നിങ്ങള്‍ക്ക് ഒരു ഗ്രാമപഞ്ചായത്ത് അംഗമാകാന്‍ പോലും കഴിയില്ലെന്നും അദ്ദേഹം പറഞ്ഞു.