മാഞ്ചസ്റ്ററിലെ ഭീകരാക്രമണത്തെ അപലപിച്ച് ഇന്ത്യ, ഭീകരതയ്ക്കെതിരെ ആഗോളതലത്തില്‍ ഐക്യത്തോടെ പോരാടണമെന്ന് ആഹ്വാനം

ഡല്‍ഹി: യുണൈറ്റഡ് കിംഗ്ഡത്തിലെ മാഞ്ചസ്റ്ററിലെ ഹീറ്റണ്‍ പാര്‍ക്ക് സിനഗോഗില്‍ നടന്ന ഭീകരാക്രമണത്തെ ഇന്ത്യ ശക്തമായി അപലപിച്ചു, ആഗോള ഭീകരത ഉയര്‍ത്തുന്ന ഭീഷണിയുടെ ശക്തമായ ഓര്‍മ്മപ്പെടുത്തലാണിതെന്ന് പറഞ്ഞു. 

സിനഗോഗിന് പുറത്ത് ആളുകളുടെ ഇടയിലേക്ക് ഒരു അക്രമി കാര്‍ ഇടിച്ചുകയറ്റി. പിന്നീട് യോം കിപ്പൂര്‍ ആരാധനയ്ക്കിടെ ആളുകളെ കുത്താന്‍ തുടങ്ങുകയും ചെയ്തതോടെ രണ്ട് പേര്‍ കൊല്ലപ്പെടുകയും നാല് പേര്‍ക്ക് ഗുരുതരമായി പരിക്കേല്‍ക്കുകയും ചെയ്ത സാഹചര്യത്തിലാണ് പ്രസ്താവന വന്നത്.

ദുഃഖത്തിന്റെ ഈ നിമിഷത്തില്‍ ന്യൂഡല്‍ഹി യുകെയിലെ ജനങ്ങളോടൊപ്പം ഉറച്ചുനില്‍ക്കുന്നുവെന്ന് വിദേശകാര്യ മന്ത്രാലയം പ്രസ്താവനയില്‍ പറഞ്ഞു.

'ഇന്ന് യോം കിപ്പൂര്‍ ആരാധനയ്ക്കിടെ മാഞ്ചസ്റ്ററിലെ ഹീറ്റണ്‍ പാര്‍ക്ക് സിനഗോഗില്‍ നടന്ന ഭീകരാക്രമണത്തെ ഞങ്ങള്‍ അപലപിക്കുന്നു,' വിദേശകാര്യ മന്ത്രാലയ വക്താവ് രണ്‍ധീര്‍ ജയ്സ്വാള്‍ പറഞ്ഞു. 

'അന്താരാഷ്ട്ര അഹിംസ ദിനത്തിലാണ് ഈ ഹീനമായ പ്രവൃത്തി നടന്നത് എന്നത് പ്രത്യേകിച്ചും ദുഃഖകരമാണ്.

ഭീകരതയുടെ ദുഷ്ടശക്തികളില്‍ നിന്ന് നാം നേരിടുന്ന വെല്ലുവിളിയുടെ മറ്റൊരു ഭയാനകമായ ഓര്‍മ്മപ്പെടുത്തലാണ് ഈ ആക്രമണം, ഐക്യത്തോടെയും യോജിച്ചതുമായ പ്രവര്‍ത്തനത്തിലൂടെ ആഗോള സമൂഹം ഇതിനെ ചെറുത്ത് തോല്‍പ്പിക്കണം. അദ്ദേഹം എക്സില്‍ എഴുതി. 

ഇന്ത്യയുടെ ചിന്തകളും പ്രാര്‍ത്ഥനകളും ഇരകള്‍ക്കും അവരുടെ കുടുംബങ്ങള്‍ക്കും മാഞ്ചസ്റ്ററിലെ ജനങ്ങള്‍ക്കും ഒപ്പമുണ്ടെന്ന് അദ്ദേഹം കൂട്ടിച്ചേര്‍ത്തു.