ഓപ്പറേഷൻ സിന്ദൂരിൽ കൊല്ലപ്പെട്ട മസൂദ് അസറിന്റെ സഹോദരന് സ്മാരകം പണിയാൻ ജെയ്ഷെ

ഡല്‍ഹി:  ഓപ്പറേഷന്‍ സിന്ദൂരില്‍ ഇന്ത്യന്‍ സൈന്യം നൂറിലധികം പാകിസ്ഥാന്‍ ഭീകരരെ വധിച്ചു. ജെയ്ഷെ മുഹമ്മദിന്റെ കമാന്‍ഡര്‍ മസൂദ് അസറിന്റെ സഹോദരന്‍ യൂസഫ് അസ്ഹറും ഈ പട്ടികയില്‍ ഉള്‍പ്പെട്ടിരുന്നു. ഇപ്പോള്‍, യൂസഫ് അസ്ഹറിന് ഒരു സ്മാരകം പണിയാനുള്ള ഒരുക്കങ്ങള്‍ പുരോഗമിക്കുന്നു.

യൂസഫ് അസ്ഹറിന്റെ അനുസ്മരണ ചടങ്ങ് പാകിസ്ഥാനിലെ പെഷവാറിലെ മര്‍കസ് ഷഹീദ് മഖ്‌സൂദാബാദില്‍ നടക്കും, ഇതില്‍ ജെയ്ഷെയുടെ നിരവധി ഉന്നത കമാന്‍ഡര്‍മാര്‍ പങ്കെടുക്കുമെന്ന് പ്രതീക്ഷിക്കുന്നു.

ഓപ്പറേഷന്‍ സിന്ദൂരില്‍ മസൂദ് അസ്ഹറിന്റെ കുടുംബത്തിലെ 10 പേര്‍ കൊല്ലപ്പെട്ടു. ബഹാവല്‍പൂരിലെ ജെയ്ഷെ ആസ്ഥാനമായ ജാമിയ മസ്ജിദ് സുബ്ഹാന്‍ അല്ലാഹ് ആക്രമിച്ച ഇന്ത്യന്‍ സൈന്യം യൂസഫ് ഉള്‍പ്പെടെ നിരവധി ഭീകരരെ വധിച്ചു. മസൂദ് അസ്ഹറും ഈ മരണങ്ങള്‍ സ്ഥിരീകരിച്ചു.

ഓപ്പറേഷന്‍ സിന്ദൂരിനുശേഷം ഒരു പ്രസ്താവന ഇറക്കിയപ്പോള്‍ മസൂദ് അസ്ഹര്‍ പറഞ്ഞത്, തന്റെ സഹോദരനെ കൂടാതെ, മൂത്ത സഹോദരിയും ഭര്‍ത്താവും, അനന്തരവനും ഭാര്യയും, 5 കുട്ടികളും ഈ ആക്രമണത്തില്‍ കൊല്ലപ്പെട്ടു എന്നാണ്.

26/11 മുംബൈ ആക്രമണങ്ങളുടെയും, ജമ്മു കശ്മീരിലെ പുല്‍വാമ, ഉറി ആക്രമണങ്ങളുടെയും സൂത്രധാരനായ മസൂദ് അസ്ഹറിനെ 2019 ല്‍ ഐക്യരാഷ്ട്രസഭ ആഗോള ഭീകരനായി പ്രഖ്യാപിച്ചു. കഴിഞ്ഞ വര്‍ഷം നവംബറില്‍ പാകിസ്ഥാനിലെ പഞ്ചാബില്‍ മസൂദ് അസ്ഹര്‍ ഇന്ത്യയ്ക്കെതിരെ പ്രകോപനപരമായ പ്രസംഗം നടത്തി.