'നിർമ്മിച്ചിരിക്കുന്നത് ക്ഷേത്രത്തിന് മുകളിൽ'; ശവകുടീരം തകർത്ത് ഹിന്ദു സംഘടന

ഡല്‍ഹി: ഉത്തര്‍പ്രദേശിലെ ഫത്തേപൂരില്‍ ഹിന്ദു സംഘടനയിലെ അംഗങ്ങള്‍ ശവകുടീരം തകര്‍ത്തു. ശവകുടീരം ഒരു ക്ഷേത്രത്തിന് മുകളിലാണ് നിര്‍മ്മിച്ചിരിക്കുന്നതെന്ന് അവകാശപ്പെട്ടാണ് നടപടി.

കൂടുതല്‍ പ്രശ്‌നങ്ങള്‍ ഉണ്ടാകാതിരിക്കാന്‍ ജില്ലാ ഭരണകൂടം പ്രദേശത്തുടനീളം കനത്ത പോലീസിനെയും പിഎസി സേനയെയും വിന്യസിക്കുകയും തര്‍ക്ക സ്ഥലത്ത് ബാരിക്കേഡുകള്‍ സ്ഥാപിക്കുകയും ചെയ്തിട്ടുണ്ട്.

സദര്‍ തഹസില്‍ പ്രദേശത്ത് സ്ഥിതി ചെയ്യുന്ന നവാബ് അബ്ദുസ് സമദിന്റെ ശവകുടീരം ഒരു ശവകുടീരമല്ലെന്നും കാലക്രമേണ മാറ്റങ്ങള്‍ വരുത്തിയ ഒരു ക്ഷേത്രമാണെന്നും ഭാരതീയ ജനതാ പാര്‍ട്ടി (ബിജെപി) ജില്ലാ പ്രസിഡന്റ് ആരോപിച്ചതിനെ തുടര്‍ന്നാണ് വിവാദം പൊട്ടിപ്പുറപ്പെട്ടത്. 

താക്കൂര്‍ ജിയുടെയും ശിവന്റെയും ആയിരം വര്‍ഷം പഴക്കമുള്ള ക്ഷേത്രമാണിതെന്ന് അദ്ദേഹം അവകാശപ്പെട്ടു. കെട്ടിടത്തിനുള്ളില്‍ ഒരു താമരപ്പൂവും ത്രിശൂലവും ഉണ്ടെന്ന് തെളിവായി അദ്ദേഹം ചൂണ്ടിക്കാട്ടി.

അവകാശവാദത്തെത്തുടര്‍ന്ന്, ഒരു ഹിന്ദു സംഘടനയിലെ അംഗങ്ങള്‍ ശവകുടീര പരിസരത്ത് കയറി ശവകുടീരത്തിന് പുറത്തുള്ള പ്രദേശം നശിപ്പിച്ചു.

സ്ഥിതിഗതികള്‍ കൂടുതല്‍ വഷളാക്കുന്ന തരത്തില്‍ ഇന്ന് സ്ഥലത്ത് പൂജ നടത്താന്‍ സംഘം പദ്ധതിയിടുന്നതായി റിപ്പോര്‍ട്ടുകള്‍ സൂചിപ്പിക്കുന്നു.