മൂന്നാം മോദി സർക്കാർ; സത്യപ്രതിജ്ഞയിൽ പങ്കെടുക്കാൻ മാലദ്വീപ് പ്രസിഡൻ്റ് ഇന്ത്യയിലെത്തിയേക്കും; ഇന്ത്യയും മാലദ്വീപും തമ്മിലുള്ള നയതന്ത്രബന്ധം വഷളായതിന് ശേഷമുള്ള പ്രസിഡന്റ് മുഹമ്മദ് മുയിസുവിന്റെ ആദ്യ ഇന്ത്യ സന്ദര്‍ശനം

ഡൽഹി: മൂന്നാം തവണ അധികാരമേൽക്കുന്ന പ്രധാനമന്ത്രി നരേന്ദ്ര മോദി സത്യപ്രതിജ്ഞാ ചടങ്ങിന് എത്തുന്ന നേതാക്കളുമായി തിങ്കളാഴ്ച കൂടിക്കാഴ്ച നടത്തുമെന്ന് റിപ്പോർട്ട്. ഉഭയകക്ഷി ബന്ധത്തിൽ തിരിച്ചടി നേരിട്ടെങ്കിലും ചടങ്ങിൽ പങ്കെടുക്കുമെന്ന് പ്രതീക്ഷിക്കുന്ന മാലദ്വീപ് പ്രസിഡൻ്റ് മുഹമ്മദ് മുയിസു ആയിരിക്കും അതിഥികളിൽ പ്രധാനി.

ഞായറാഴ്ച ഡൽഹിയിൽ നടക്കുന്ന സത്യപ്രതിജ്ഞാ ചടങ്ങിൽ പ്രസിഡൻ്റ് മുയിസു പങ്കെടുക്കുമെന്ന് പ്രതീക്ഷിക്കുന്നതായി മാലദ്വീപ് സർക്കാർ വൃത്തങ്ങൾ അറിയിച്ചു.

എന്നാൽ, ഇതുവരെ ഔദ്യോഗിക പ്രഖ്യാപനം പുറത്തുവന്നിട്ടില്ല. മുതിർന്ന സർക്കാർ ഉദ്യോഗസ്ഥരോടൊപ്പം ചടങ്ങിനായി പ്രസിഡൻ്റ് മുയിസു ശനിയാഴ്ച ന്യൂഡൽഹിയിൽ എത്തുമെന്നാണ് റിപ്പോർട്ട്.

ബംഗ്ലാദേശ്, ശ്രീലങ്ക, ഭൂട്ടാൻ, നേപ്പാൾ, മൗറീഷ്യസ്, സീഷെൽസ് തുടങ്ങിയ രാജ്യങ്ങളിലെ നേതാക്കൾക്കും ചടങ്ങിൽ ക്ഷണമുണ്ട്. ബംഗ്ലാദേശ് പ്രധാനമന്ത്രി ഷെയ്ഖ് ഹസീന, ശ്രീലങ്കൻ പ്രസിഡൻ്റ് റനിൽ വിക്രമസിംഗെ, നേപ്പാൾ പ്രധാനമന്ത്രി പുഷ്പ കമൽ ദഹൽ പ്രചണ്ഡ എന്നിവർ ചടങ്ങിലെത്തുമെന്ന് ഔദ്യോഗികമായി സ്ഥിരീകരിച്ചു.

സത്യപ്രതിജ്ഞാ ചടങ്ങിനായി പ്രസിഡൻ്റ് മുയിസു ഇന്ത്യയിലെത്തുകയാണെങ്കിൽ, 2014ൽ മോദിയുടെ ആദ്യ സത്യപ്രതിജ്ഞാ ചടങ്ങിന് എത്തിയ തൻ്റെ ഉപദേഷ്ടാവും മുൻഗാമികളിലൊരാളുമായ അബ്ദുല്ല യമീൻ്റെ പാത പിന്തുടരുകയാകും ഇത്.