പോർച്ചുഗലിലേക്ക് കുടിയേറാൻ ശ്രമിക്കുന്നതിനിടെ ഗുജറാത്തിലെ ദമ്പതികളെയും മകളെയും ലിബിയയിൽ തട്ടിക്കൊണ്ടുപോയതായി വിദേശകാര്യ മന്ത്രാലയത്തിന്റെ മുന്നറിയിപ്പ്

അഹമ്മദാബാദ്: ഗുജറാത്തിലെ മെഹ്സാന ജില്ലയില്‍ നിന്നുള്ള യുവ ദമ്പതികളെയും അവരുടെ മൂന്ന് വയസ്സുള്ള മകളെയും ലിബിയയില്‍ നിന്ന് രണ്ട് കോടി രൂപ മോചനദ്രവ്യം ആവശ്യപ്പെട്ട് തട്ടിക്കൊണ്ടുപോയി. തട്ടിക്കൊണ്ടുപോയ ദമ്പതികള്‍ കിസ്മത്സിങ് ചാവ്ദ, ഭാര്യ ഹീനബെന്‍ എന്നിവരാണെന്ന് തിരിച്ചറിഞ്ഞു.

യൂറോപ്പിലെ പോര്‍ച്ചുഗലിലേക്ക് താമസം മാറാന്‍ ശ്രമിക്കുന്നതിനിടെയാണ് അവരെയും മകള്‍ ദേവാന്‍ഷിയെയും വടക്കേ ആഫ്രിക്കന്‍ രാജ്യത്ത് ബന്ദികളാക്കിയത്. ചാവ്ദയുടെ സഹോദരന്‍ പോര്‍ച്ചുഗലില്‍ താമസിക്കുന്നുണ്ടെന്നും ദമ്പതികള്‍ താമസം മാറ്റാന്‍ ശ്രമിച്ചുകൊണ്ടിരിക്കുകയാണെന്നും മെഹ്‌സാന പോലീസ് സൂപ്രണ്ട് (എസ്പി) ഹിമാന്‍ഷു സോളങ്കി പറഞ്ഞു. 

നവംബര്‍ 29 ന് ദമ്പതികളും മകളും അഹമ്മദാബാദില്‍ നിന്ന് ദുബായിലേക്ക് വിമാനത്തില്‍ കയറിയതായി അദ്ദേഹം പറഞ്ഞു.

ദുബായില്‍ നിന്ന് ദമ്പതികളെ ലിബിയയിലെ ബംഗാസി സിറ്റിയിലേക്ക് കൊണ്ടുപോയി. അവിടെ വെച്ചാണ് അവരെ തട്ടിക്കൊണ്ടുപോയതെന്ന് അദ്ദേഹം പറഞ്ഞു. സംഭവത്തെക്കുറിച്ച് മെഹ്സാന കളക്ടര്‍ എസ്‌കെ പ്രജാപതിയെ അറിയിച്ചിട്ടുണ്ടെന്നും സോളങ്കി പറഞ്ഞു.

'ചാവ്ദയുടെ സഹോദരന്‍ പോര്‍ച്ചുഗലില്‍ സ്ഥിരതാമസമാക്കിയിരിക്കുകയാണ്, പോര്‍ച്ചുഗല്‍ ആസ്ഥാനമായുള്ള ഒരു ഏജന്റിന്റെ സഹായത്തോടെയാണ് അദ്ദേഹം യാത്ര ചെയ്തത്. അവിടെ സ്ഥിരതാമസമാക്കുക എന്ന ഉദ്ദേശ്യത്തോടെയാണ് കുടുംബം യാത്ര ചെയ്തത്, കേസില്‍ ഉള്‍പ്പെട്ട ഏജന്റുമാര്‍ ഇന്ത്യക്കാരല്ല,' സോളങ്കിയെ ഉദ്ധരിച്ച് വാര്‍ത്താ ഏജന്‍സിയായ പിടിഐ റിപ്പോര്‍ട്ട് ചെയ്തു.

തട്ടിക്കൊണ്ടുപോയവര്‍ ചാവ്ദയുടെ കുടുംബാംഗങ്ങളെയും ബന്ധുക്കളെയും ബന്ധപ്പെടുകയും മോചനദ്രവ്യമായി രണ്ട് കോടി രൂപ ആവശ്യപ്പെടുകയും ചെയ്തതായി സോളങ്കി പറഞ്ഞു.

കുടുംബം മെഹ്‌സാന കളക്ടര്‍ പ്രജാപതിയെ സമീപിച്ചു. സംഭവത്തെക്കുറിച്ച് ഗുജറാത്ത് സര്‍ക്കാരിനെയും വിദേശകാര്യ മന്ത്രാലയത്തെയും (എംഇഎ) അറിയിച്ചിട്ടുണ്ടെന്ന് അദ്ദേഹം പറഞ്ഞു.