എന്തുകൊണ്ടാണ് അദ്ദേഹം സംവാദത്തില്‍ നിന്ന് ഒഴിഞ്ഞുമാറുന്നത്? ആദിത്യ താക്കറെയും പാര്‍ട്ടിയും അധാര്‍മ്മികമായ തിരഞ്ഞെടുപ്പ് സമ്പ്രദായങ്ങളില്‍ ഏര്‍പ്പെടുകയാണെന്ന് മിലിന്ദ് ദിയോറ

മുംബൈ: ശിവസേന (യുബിടി) നേതാവ് ആദിത്യ താക്കറെയും അദ്ദേഹത്തിന്റെ പാര്‍ട്ടിയും പൊതു സംവാദത്തില്‍ നിന്ന് ഒളിച്ചോടി അധാര്‍മ്മികമായ തിരഞ്ഞെടുപ്പ് സമ്പ്രദായങ്ങളില്‍ ഏര്‍പ്പെടുകയാണെന്ന് ശിവസേന എംപിയും വോര്‍ളി നിയമസഭാ സ്ഥാനാര്‍ത്ഥിയുമായ മിലിന്ദ് ദേവ്‌റയുടെ ആരോപണം.

കുറച്ച് ദിവസങ്ങള്‍ക്ക് മുമ്പ് വോര്‍ലി, മുംബൈ, മഹാരാഷ്ട്ര എന്നിവയുടെ ഭാവിയെക്കുറിച്ച് സംവാദത്തിന് ഞാന്‍ ആദിത്യ താക്കറെയെ ക്ഷണിച്ചിരുന്നു.

ജനാധിപത്യത്തെ ശക്തിപ്പെടുത്തുന്നതിനെക്കുറിച്ചും തിരഞ്ഞെടുപ്പ് കാലത്ത് സംവാദങ്ങളുടെ ആവശ്യകതയെക്കുറിച്ചും അദ്ദേഹം പലപ്പോഴും സംസാരിക്കാറുണ്ട് എന്നിരിക്കെ എന്തുകൊണ്ടാണ് അദ്ദേഹം സംവാദത്തില്‍ നിന്ന് ഒഴിഞ്ഞുമാറുന്നത്? ദേവ്‌റ ചോദിച്ചു.

വോട്ടര്‍മാരെ സ്വാധീനിക്കുന്നതിനായി ശിവസേന (യുബിടി) നേതാക്കള്‍ പണം വിതരണം ചെയ്യുകയും സൊസൈറ്റികളില്‍ ക്യാമറകള്‍ സ്ഥാപിക്കുകയും ചെയ്യുന്നുവെന്നും ദേവ്റ ആരോപിച്ചു.

വോര്‍ളി അസംബ്ലി സീറ്റില്‍ നിന്ന് ആദിത്യ താക്കറെയ്ക്കെതിരായ തന്റെ മത്സരത്തെ ഒരു രാഷ്ട്രീയ പോരാട്ടമായി വിശേഷിപ്പിച്ച ദേവ്റ നേരത്തെ തന്റെ സ്പീഡ് ബ്രേക്കര്‍ രാഷ്ട്രീയത്തിലൂടെ മുംബൈയിലെയും മഹാരാഷ്ട്രയിലെയും വികസനത്തെ ആദിത്യ തടസ്സപ്പെടുത്തുന്നുവെന്നും ആരോപിച്ചിരുന്നു.