ബിജെപിയുടെ 'ഒരു രാജ്യം, ഒരു തിരഞ്ഞെടുപ്പ്' ജനാധിപത്യത്തിന് ഭീഷണി. ആഞ്ഞടിച്ച് എംകെ സ്റ്റാലിന്‍

ചെന്നൈ: ഒരു രാജ്യം, ഒരു തിരഞ്ഞെടുപ്പ് നയത്തിനായുള്ള ബിജെപി നേതൃത്വത്തിലുള്ള കേന്ദ്രസര്‍ക്കാരിന്റെ നീക്കത്തെ ശക്തമായി വിമര്‍ശിച്ച് തമിഴ്നാട് മുഖ്യമന്ത്രി എംകെ സ്റ്റാലിന്‍ രംഗത്ത്.

ഇത് ഇന്ത്യയുടെ ജനാധിപത്യത്തെയും വൈവിധ്യത്തെയും ഭീഷണിപ്പെടുത്തുന്ന ഫെഡറല്‍ വിരുദ്ധ നീക്കമാണെന്ന് അദ്ദേഹം വിശേഷിപ്പിച്ചു.

തിരഞ്ഞെടുപ്പ് പരിഷ്‌കരണത്തിന്റെ മറവില്‍ ബി.ജെ.പി ഏകീകൃത ഭരണം അടിച്ചേല്‍പ്പിക്കാന്‍ ശ്രമിക്കുകയാണെന്ന് സ്റ്റാലിന്‍ കുറ്റപ്പെടുത്തി

ഫെഡറല്‍ വിരുദ്ധവും അപ്രായോഗികവുമായ 'ഒരു രാഷ്ട്രം, ഒരു തിരഞ്ഞെടുപ്പ്' നീക്കത്തെ ഇന്ത്യ ചെറുത്തുനില്‍ക്കും.

കാരണം അത് രാജ്യത്തെ ഒരു ഏകീകൃത ഭരണത്തിന്റെ ആപത്തുകളിലേക്ക് തള്ളിവിടുകയും വൈവിധ്യത്തെയും ജനാധിപത്യത്തെയും കൊല്ലുകയും ചെയ്യും, സ്റ്റാലിന്‍ പറഞ്ഞു.

രാഷ്ട്രപതി ഭരണം കൊണ്ടുവരുകയാണ് ബിജെപിയുടെ ആത്യന്തിക ലക്ഷ്യമെന്നും ഇത് ഇന്ത്യന്‍ ഭരണഘടനയുടെ അന്തസത്തക്ക് വിരുദ്ധമാണെന്നും മുഖ്യമന്ത്രി ആരോപിച്ചു

ഈ നിര്‍ദ്ദേശം പാസായാല്‍, ആനുകാലിക സംസ്ഥാന തിരഞ്ഞെടുപ്പ് സമ്പ്രദായം ഇല്ലാതാക്കുമെന്നും അതുവഴി പ്രാദേശിക വികാരങ്ങളെ തുരങ്കം വയ്ക്കുമെന്നും ഇന്ത്യയുടെ വൈവിധ്യത്തെ നശിപ്പിക്കുമെന്നും സ്റ്റാലിന്‍ വാദിച്ചു.