ഇന്ത്യയുടെ കണ്ണ് നേപ്പാളിലാണ്, അവിടുത്തെ സ്ഥിതി ഹൃദയഭേദകമാണ്, ജനങ്ങള്‍ സമാധാനം പാലിക്കണമെന്ന് പ്രധാനമന്ത്രി മോദി

ഡല്‍ഹി: അയല്‍രാജ്യമായ നേപ്പാളില്‍ പ്രതിഷേധങ്ങള്‍ ശക്തമാകുന്നു. പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ സുരക്ഷാകാര്യ മന്ത്രിസഭാ സമിതി (സിസിഎസ്) യോഗം ചേരുകയും സ്ഥിതിഗതികള്‍ വിശദമായി ചര്‍ച്ച ചെയ്യുകയും ചെയ്തു.

നേപ്പാളിലെ സ്ഥിതി ഹൃദയഭേദകമാണെന്ന് വിശേഷിപ്പിച്ച പ്രധാനമന്ത്രി മോദി, സമാധാനം നിലനിര്‍ത്താന്‍ അവിടത്തെ പൗരന്മാരോട് അഭ്യര്‍ത്ഥിച്ചു.

നേരത്തെ, ഇന്ത്യന്‍ വിദേശകാര്യ മന്ത്രാലയവും നേപ്പാളിലെ സ്ഥിതിഗതികളെക്കുറിച്ച് പ്രതികരിക്കുകയും അവിടത്തെ പ്രതിഷേധങ്ങളില്‍ കൊല്ലപ്പെട്ട യുവാക്കള്‍ക്ക് അനുശോചനം അറിയിക്കുകയും ചെയ്തു. നേപ്പാളിലേക്കുള്ള യാത്ര ഒഴിവാക്കണമെന്നും അവിടെ താമസിക്കുന്ന ഇന്ത്യക്കാര്‍ വീടുകളില്‍ തന്നെ തുടരണമെന്നും ഇന്ത്യയും നിര്‍ദ്ദേശിച്ചിട്ടുണ്ട്.

'ഹിമാചല്‍ പ്രദേശില്‍ നിന്നും പഞ്ചാബില്‍ നിന്നും തിരിച്ചെത്തിയ ശേഷം, ഇന്ന് കാബിനറ്റ് കമ്മിറ്റി ഓണ്‍ സെക്യൂരിറ്റി (സിസിഎസ്)യില്‍ നേപ്പാളിലെ സംഭവവികാസങ്ങളെക്കുറിച്ച് ചര്‍ച്ച ചെയ്തു. നേപ്പാളിലെ അക്രമങ്ങള്‍ ഹൃദയഭേദകമാണ്.

നിരവധി യുവാക്കള്‍ക്ക് ജീവന്‍ നഷ്ടപ്പെട്ടതില്‍ ഞാന്‍ വളരെയധികം ദുഃഖിതനാണ്. നേപ്പാളിന്റെ സ്ഥിരത, സമാധാനം, സമൃദ്ധി എന്നിവ ഞങ്ങള്‍ക്ക് വളരെ പ്രധാനമാണ്. സമാധാനത്തെ പിന്തുണയ്ക്കാന്‍ നേപ്പാളിലെ എന്റെ എല്ലാ സഹോദരീസഹോദരന്മാരോടും ഞാന്‍ താഴ്മയോടെ അഭ്യര്‍ത്ഥിക്കുന്നു.'-പ്രധാനമന്ത്രി മോദി എക്‌സില്‍ കുറിച്ചു.

സിസിഎസില്‍ ഏതൊക്കെ വിഷയങ്ങളാണ് ചര്‍ച്ച ചെയ്തതെന്ന് ഔദ്യോഗിക വിവരങ്ങളൊന്നുമില്ല, എന്നാല്‍ വിശ്വസനീയമായ സ്രോതസ്സുകള്‍ പ്രകാരം, നേപ്പാളിലെ നിലവിലെ സാഹചര്യം ഒരു ബാഹ്യശക്തിയും മുതലെടുക്കുന്നില്ലെന്ന് ഉറപ്പാക്കാന്‍ ഇന്ത്യ ശ്രദ്ധാലുവാണ്. സ്ഥിതിഗതികള്‍ സാധാരണ നിലയിലാക്കാന്‍ എല്ലാവരും വിശ്വസിക്കുന്ന ഒരു സര്‍ക്കാര്‍ നേപ്പാളില്‍ എത്രയും വേഗം രൂപീകരിക്കണമെന്നും ഇന്ത്യ ആഗ്രഹിക്കുന്നു.

ഇന്ത്യയുടെ ഭാഗത്തുനിന്ന് ഏതെങ്കിലും തരത്തിലുള്ള ഇടപെടല്‍ സാധ്യമാണോ എന്ന് ചോദിച്ചപ്പോള്‍, അയല്‍രാജ്യത്തിന്റെ ആഭ്യന്തര കാര്യങ്ങളില്‍ ഇടപെടില്ലെന്ന നയത്തില്‍ ഇന്ത്യ ഉറച്ചുനില്‍ക്കുന്നുവെന്ന് വൃത്തങ്ങള്‍ പറഞ്ഞു.