കൃത്രിമ ബുദ്ധി ഉപയോഗിച്ച് നിർമ്മിച്ച പ്രധാനമന്ത്രി മോദിയുടെയും അമ്മയുടെയും വീഡിയോകൾ നീക്കം ചെയ്യണമെന്ന് ആവശ്യപ്പെട്ട് കോൺഗ്രസിന് പട്‌ന ഹൈക്കോടതി നോട്ടീസ്

പട്‌ന: പ്രധാനമന്ത്രി നരേന്ദ്ര മോദിയുടെ ജന്മദിനത്തോടനുബന്ധിച്ച് പട്‌ന ഹൈക്കോടതി ഒരു സുപ്രധാന ഉത്തരവ് പുറപ്പെടുവിച്ചു. രാഹുല്‍ ഗാന്ധി, ഇന്ത്യന്‍ തിരഞ്ഞെടുപ്പ് കമ്മീഷന്‍, മെറ്റ, ഗൂഗിള്‍, എക്‌സ്, വിവരസാങ്കേതിക മന്ത്രാലയം എന്നിവയ്ക്ക് കോടതി നോട്ടീസ് അയച്ചു. 

ഹര്‍ജിക്കാരനായ വിവേകാനന്ദ് സിംഗ് സമര്‍പ്പിച്ച പൊതുതാല്‍പ്പര്യ ഹര്‍ജി പരിഗണിക്കുന്നതിനിടെയാണ് ആക്ടിംഗ് ചീഫ് ജസ്റ്റിസ് പി.ബി. ബജന്ത്രി അധ്യക്ഷനായ ഡിവിഷന്‍ ബെഞ്ച് ഉത്തരവ് പുറപ്പെടുവിച്ചത്.

പ്രധാനമന്ത്രി മോദിക്കും അമ്മയ്ക്കുമെതിരായ ആക്ഷേപകരമായ കാര്യങ്ങള്‍ സോഷ്യല്‍ മീഡിയ പ്ലാറ്റ്ഫോമുകളിലൂടെയും ഓണ്‍ലൈന്‍ പോര്‍ട്ടലുകളിലൂടെയും പ്രചരിപ്പിക്കുന്നുണ്ടെന്ന് ഹര്‍ജിക്കാരന്‍ പറയുന്നു. 

എല്ലാ പോര്‍ട്ടലുകളിലും ഇത്തരം കാര്യങ്ങള്‍ പ്രചരിപ്പിക്കുന്നത് ഉടന്‍ നിര്‍ത്തിവയ്ക്കാനും അവ നീക്കം ചെയ്യുന്നുവെന്ന് ഉറപ്പാക്കാനും ബന്ധപ്പെട്ട ഏജന്‍സികള്‍ക്ക് നിര്‍ദ്ദേശം നല്‍കണമെന്ന് ഹര്‍ജിക്കാരനെ പ്രതിനിധീകരിച്ച് സുപ്രീം കോടതി അഭിഭാഷകരായ സന്തോഷ് കുമാര്‍, സഞ്ജയ് അഗര്‍വാള്‍, പ്രവീണ്‍ കുമാര്‍ എന്നിവര്‍ കോടതിയെ സമീപിച്ചു.

പ്രധാനമന്ത്രിയെയും അമ്മയെയും ലക്ഷ്യമിട്ടുള്ള തെറ്റായതും അപകീര്‍ത്തികരവുമായ പരാമര്‍ശങ്ങള്‍ ഓണ്‍ലൈനില്‍ ആസൂത്രിതമായി പ്രചരിപ്പിക്കപ്പെടുന്നുണ്ടെന്ന് ഹര്‍ജിക്കാരനെ പ്രതിനിധീകരിച്ച് മുതിര്‍ന്ന അഭിഭാഷകന്‍ സന്തോഷ് കുമാര്‍ വാദിച്ചു.

കോടതി ഇത് ഗൗരവമായി കാണുകയും കേന്ദ്ര-സംസ്ഥാന സര്‍ക്കാരുകളില്‍ നിന്ന് പ്രതികരണങ്ങള്‍ തേടുകയും ചെയ്തു.