പ്രധാനമന്ത്രി മോദി ഇന്ന് അരുണാചൽ, ത്രിപുര സന്ദർശനം നടത്തുന്നു, വടക്കുകിഴക്കൻ മേഖലയുടെ വികസനത്തിന് സുപ്രധാന ദിനമാണിതെന്ന് മോദി

ഡല്‍ഹി: അരുണാചല്‍ പ്രദേശ് സന്ദര്‍ശന വേളയില്‍ ഊര്‍ജ്ജം, കണക്റ്റിവിറ്റി, ആരോഗ്യം എന്നിവയുമായി ബന്ധപ്പെട്ട നിരവധി പ്രധാന പദ്ധതികള്‍ക്ക് തുടക്കം കുറിക്കുന്നതിനാല്‍, വടക്കുകിഴക്കന്‍ മേഖലയുടെ വികസനത്തിന് തിങ്കളാഴ്ച വളരെ പ്രധാനപ്പെട്ട ദിവസമായിരിക്കുമെന്ന് പ്രധാനമന്ത്രി നരേന്ദ്ര മോദി.

ത്രിപുരയിലെ മാതാ ത്രിപുര സുന്ദരി ക്ഷേത്ര സമുച്ചയത്തിലെ വികസന പ്രവര്‍ത്തനങ്ങളുടെ ഉദ്ഘാടനവും അദ്ദേഹം നിര്‍വഹിക്കും.

സെപ്റ്റംബര്‍ 22 ന് മോദി അരുണാചല്‍ പ്രദേശും ത്രിപുരയും സന്ദര്‍ശിക്കുമെന്നും ഇറ്റാനഗറില്‍ 5,100 കോടി രൂപയുടെ വികസന പദ്ധതികള്‍ക്ക് തുടക്കം കുറിക്കുമെന്നും തുടര്‍ന്ന് ത്രിപുരയിലേക്ക് പോയി പ്രാര്‍ത്ഥനകള്‍ നടത്തുകയും മാതാ ത്രിപുര സുന്ദരി ക്ഷേത്ര സമുച്ചയം സന്ദര്‍ശിക്കുകയും വികസന പദ്ധതികള്‍ ഉദ്ഘാടനം ചെയ്യുകയും ചെയ്യുമെന്ന് പ്രധാനമന്ത്രിയുടെ ഓഫീസ് (പിഎംഒ) പുറത്തിറക്കിയ പ്രസ്താവനയില്‍ പറയുന്നു.

തവാങ്ങില്‍ ഒരു അത്യാധുനിക കണ്‍വെന്‍ഷന്‍ സെന്ററിനും പ്രധാനമന്ത്രി തറക്കല്ലിടും. ജില്ലയില്‍ 9,820 അടി ഉയരത്തില്‍ സ്ഥിതി ചെയ്യുന്ന ഈ കേന്ദ്രം ദേശീയ, അന്തര്‍ദേശീയ സമ്മേളനങ്ങളും സാംസ്‌കാരികോത്സവങ്ങളും നടത്തുന്നതിനുള്ള ഒരു പ്രധാന സൗകര്യമായി വര്‍ത്തിക്കും. 

വടക്കുകിഴക്കന്‍ സംസ്ഥാനങ്ങളിലെ ഈ സംരംഭങ്ങള്‍ സാമ്പത്തിക പ്രവര്‍ത്തനങ്ങള്‍ വര്‍ദ്ധിപ്പിക്കുകയും ജീവിത നിലവാരം മെച്ചപ്പെടുത്തുകയും മേഖലയിലെ കണക്റ്റിവിറ്റി വര്‍ദ്ധിപ്പിക്കുകയും ചെയ്യുമെന്ന് പ്രതീക്ഷിക്കുന്നു.