ലോകസമാധാനത്തിനുവേണ്ടി വാദിച്ച പ്രധാനമന്ത്രി നരേന്ദ്ര മോദിയെ പ്രശംസിച്ച് ഹിരോഷിമ അണുബോംബ് ആക്രമണത്തിൽ അതിജീവിച്ചവർ

ടോക്കിയോ: ലോകസമാധാനത്തിനുവേണ്ടി വാദിച്ച പ്രധാനമന്ത്രി നരേന്ദ്ര മോദിയെ ഹിരോഷിമ അണുബോംബ് ആക്രമണത്തില്‍ നിന്ന് അതിജീവിച്ചവര്‍ പ്രശംസിച്ചു. ജാപ്പനീസ് എന്‍ജിഒ പീസ് കള്‍ച്ചര്‍ വില്ലേജ് അദ്ദേഹത്തിന് ആദരമര്‍പ്പിച്ച് ഒരു പ്രശസ്തിപത്രം നല്‍കി.

പ്രശസ്തി പത്രത്തില്‍, ലോകമെമ്പാടും സമാധാനം പ്രോത്സാഹിപ്പിക്കുന്നതിനുള്ള പ്രധാനമന്ത്രി മോദിയുടെ ശ്രമങ്ങളെ അഭിനന്ദിക്കുകയും സമാധാനത്തിനായുള്ള ആഗോള ശബ്ദമായി അദ്ദേഹത്തെ വിശേഷിപ്പിക്കുകയും ചെയ്തു.

ആണവായുധ രഹിത ഭാവിക്കായുള്ള സംഭാഷണം, സഹകരണം, കൂട്ടായ ഉത്തരവാദിത്തം എന്നിവയിലാണ് മനുഷ്യരാശിയുടെ ഏറ്റവും വലിയ ശക്തിയെന്ന് പ്രധാനമന്ത്രി മോദിയുടെ നേതൃത്വം വീണ്ടും ഉറപ്പിക്കുന്നുവെന്ന് പ്രശസ്തി പത്രത്തില്‍ പറയുന്നു.

'ഹിരോഷിമയിലെ അണുബോംബ് വര്‍ഷത്തിന്റെ സമയത്ത് എനിക്ക് ഏകദേശം ആറ് വയസ്സായിരുന്നു. ഈ ദുരന്തത്തിന്റെ ഭീകരത ഞാന്‍ അനുഭവിച്ചു, കൂട്ട നശീകരണ ആയുധങ്ങള്‍ ഇല്ലാതാക്കാന്‍ ലോകത്തോട് ആവശ്യപ്പെടുന്നതിനായി എന്റെ ജീവിതം സമര്‍പ്പിച്ചു.

ബോംബാക്രമണത്തില്‍ എന്റെ എല്ലാ സ്‌കൂള്‍ സുഹൃത്തുക്കളെയും എനിക്ക് നഷ്ടപ്പെട്ടു, അതില്‍ നിന്ന് രക്ഷപ്പെട്ട ഒരേയൊരു വ്യക്തി ഞാനായിരുന്നു. ചില ഇരകളെ ഇന്നും കാണാതായിരിക്കുന്നു,' തോഷിക്കോ തനക തന്റെ അനുഭവം പങ്കുവെച്ചു.

ആണവായുധങ്ങള്‍ സംബന്ധിച്ച സംയമനം പാലിക്കുന്നതിനെക്കുറിച്ചുള്ള പ്രധാനമന്ത്രി മോദിയുടെ നിലപാടിനെയും തനക പ്രശംസിച്ചു.