പ്രസിഡന്റ് ട്രംപ് നിങ്ങളെ ഒരു മികച്ച സുഹൃത്തായി കണക്കാക്കുന്നു'. നിയുക്ത യുഎസ് അംബാസഡർ സെർജിയോ ഗോർ പ്രധാനമന്ത്രി മോദിയെ കണ്ടു

ഡല്‍ഹി: നിയുക്ത യുഎസ് അംബാസഡര്‍ സെര്‍ജിയോ ഗോര്‍ പ്രധാനമന്ത്രി മോദിയെ കണ്ടു. പ്രസിഡന്റ് ട്രംപ് അദ്ദേഹത്തെ ഒരു മികച്ച സുഹൃത്തായിട്ടാണ് കാണുന്നതെന്ന് സെര്‍ജിയോ ഗോര്‍ പറഞ്ഞു. 

'ഇന്ത്യയുമായുള്ള ബന്ധത്തിന് യുഎസ് വളരെയധികം വിലമതിക്കുന്നു, പ്രസിഡന്റ് ഡൊണാള്‍ഡ് ട്രംപ് പ്രധാനമന്ത്രി മോദിയെ ഒരു മികച്ച സുഹൃത്തായി കണക്കാക്കുന്നു,' അദ്ദേഹം പറഞ്ഞു. 

വെള്ളിയാഴ്ച ന്യൂഡല്‍ഹിയിലെത്തിയ ഗോര്‍, വിദേശകാര്യ മന്ത്രി എസ് ജയ്ശങ്കര്‍, എന്‍എസ്എ അജിത് ഡോവല്‍, വിദേശകാര്യ സെക്രട്ടറി വിക്രം മിശ്രി എന്നിവരുമായി ഉള്‍പ്പെടെ നിരവധി മികച്ച കൂടിക്കാഴ്ചകള്‍ നടത്തി.

'പ്രധാനമന്ത്രി മോദിയുമായി എനിക്ക് ഒരു കൂടിക്കാഴ്ച ഉണ്ടായിരുന്നു. പ്രതിരോധം, വ്യാപാരം, സാങ്കേതികവിദ്യ എന്നിവയുള്‍പ്പെടെയുള്ള ഉഭയകക്ഷി വിഷയങ്ങള്‍ ഞങ്ങള്‍ ചര്‍ച്ച ചെയ്തു. നിര്‍ണ്ണായക ധാതുക്കളുടെ പ്രാധാന്യത്തെക്കുറിച്ചും ഞങ്ങള്‍ ചര്‍ച്ച ചെയ്തു,' അദ്ദേഹം പറഞ്ഞു.

 'ഇന്ത്യയിലെ യുഎസിന്റെ നിയുക്ത അംബാസഡര്‍ സെര്‍ജിയോ ഗോറിനെ സ്വീകരിക്കുന്നതില്‍ സന്തോഷം. അദ്ദേഹത്തിന്റെ കാലാവധി ഇന്ത്യ-യുഎസ് സമഗ്ര ആഗോള തന്ത്രപരമായ പങ്കാളിത്തത്തെ കൂടുതല്‍ ശക്തിപ്പെടുത്തുമെന്ന് എനിക്ക് ഉറപ്പുണ്ട്. പ്രധാനമന്ത്രി മോദി എക്സിലെ ഒരു പോസ്റ്റില്‍ പറഞ്ഞു.