'ഭീകരതയോട് ഇന്ത്യക്ക് ഒരു വിട്ടുവീഴ്ചയുമില്ല. ഓസ്‌ട്രേലിയയിലെ ഭീകരാക്രമണത്തെ ശക്തമായി അപലപിച്ച് പ്രധാനമന്ത്രി മോദി

ഡല്‍ഹി: ഓസ്ട്രേലിയയിലെ സിഡ്നിയിലെ ബോണ്ടി ബീച്ചില്‍ ഹനുക്ക ജൂത ഉത്സവത്തിനിടെ നടന്ന ഭീകരാക്രമണത്തെ പ്രധാനമന്ത്രി നരേന്ദ്ര മോദി ശക്തമായി അപലപിച്ചു. ആക്രമണത്തില്‍ കുറഞ്ഞത് 11 പേര്‍ കൊല്ലപ്പെടുകയും 29 പേര്‍ക്ക് പരിക്കേല്‍ക്കുകയും ചെയ്തു.

ദുഃഖത്തിന്റെ വേളയില്‍ ഇരകളോടും അവരുടെ കുടുംബങ്ങളോടും ഐക്യദാര്‍ഢ്യം പ്രകടിപ്പിച്ചുകൊണ്ട്, ഭീകരതയോട് ഇന്ത്യക്ക് ഒരു വിട്ടുവീഴ്ചയുമില്ലെന്ന് പ്രധാനമന്ത്രി പറഞ്ഞു.

'ജൂത ഉത്സവമായ ഹനുക്കയുടെ ആദ്യ ദിവസം ആഘോഷിക്കുന്ന ആളുകളെ ലക്ഷ്യമിട്ട് ഓസ്ട്രേലിയയിലെ ബോണ്ടി ബീച്ചില്‍ ഇന്ന് നടന്ന ഭീകരാക്രമണത്തെ ശക്തമായി അപലപിക്കുന്നു,' പ്രധാനമന്ത്രി മോദി ഒരു എക്‌സ് പോസ്റ്റില്‍ പറഞ്ഞു.

'ഇന്ത്യയിലെ ജനങ്ങളുടെ പേരില്‍, പ്രിയപ്പെട്ടവരെ നഷ്ടപ്പെട്ട കുടുംബങ്ങള്‍ക്ക് എന്റെ ആത്മാര്‍ത്ഥ അനുശോചനം അറിയിക്കുന്നു. ദുഃഖത്തിന്റെ ഈ വേളയില്‍ ഓസ്ട്രേലിയയിലെ ജനങ്ങളോടൊപ്പം ഞങ്ങള്‍ ഐക്യദാര്‍ഢ്യം പ്രഖ്യാപിക്കുന്നു,' അദ്ദേഹം പറഞ്ഞു.

ഭീകരതയോട് ഇന്ത്യ ഒരു തരത്തിലും സഹിഷ്ണുത കാണിക്കില്ലെന്നും അതിന്റെ എല്ലാ രൂപങ്ങള്‍ക്കും പ്രകടനങ്ങള്‍ക്കുമെതിരായ പോരാട്ടത്തെ പിന്തുണയ്ക്കുന്നുവെന്നും പ്രധാനമന്ത്രി കൂട്ടിച്ചേര്‍ത്തു.