അരുണാചൽ പഞ്ചായത്ത് തിരഞ്ഞെടുപ്പിൽ ബിജെപി തൂത്തുവാരി; നല്ല ഭരണത്തിനുള്ള ജനവിധിയെന്ന് പ്രധാനമന്ത്രി മോദി

ഡല്‍ഹി: അരുണാചല്‍ പ്രദേശ് പഞ്ചായത്ത് തെരഞ്ഞെടുപ്പില്‍ ഭാരതീയ ജനതാ പാര്‍ട്ടി നേടിയ നിര്‍ണായക വിജയത്തെ പ്രധാനമന്ത്രി നരേന്ദ്ര മോദി പ്രശംസിച്ചു.

പാര്‍ട്ടിയുടെ 'നല്ല ഭരണ രാഷ്ട്രീയത്തിനുള്ള' വ്യക്തമായ അംഗീകാരമാണിതെന്ന് അദ്ദേഹം വിശേഷിപ്പിച്ചു. ജില്ലാ പരിഷത്ത്, ഗ്രാമപഞ്ചായത്ത് മണ്ഡലങ്ങളിലുടനീളം ബിജെപിയുടെ ശക്തമായ പ്രകടനത്തിന് മറുപടിയായി, പാര്‍ട്ടിയിലുള്ള ജനങ്ങളുടെ തുടര്‍ച്ചയായ പിന്തുണയ്ക്കും വിശ്വാസത്തിനും പ്രധാനമന്ത്രി നന്ദി പറഞ്ഞു. 

'അരുണാചല്‍ പ്രദേശിലെ ജനങ്ങള്‍ സദ്ഭരണ രാഷ്ട്രീയത്തിന് അചഞ്ചലമായ പിന്തുണ നല്‍കുന്നു! ബിജെപിയോട് കാണിച്ച സ്‌നേഹത്തിന് അരുണാചല്‍ പ്രദേശിലെ ജനങ്ങള്‍ക്ക് ഞാന്‍ നന്ദി പറയുന്നു.

സംസ്ഥാനത്തിന്റെ പരിവര്‍ത്തനത്തിനായി പ്രവര്‍ത്തിക്കുന്നത് തുടരാനുള്ള ഞങ്ങളുടെ ദൃഢനിശ്ചയത്തെ ഇത് ശക്തിപ്പെടുത്തുന്നു.'എക്സിലെ ഒരു പോസ്റ്റില്‍ പ്രധാനമന്ത്രി പറഞ്ഞു.

'ജനങ്ങള്‍ക്കിടയില്‍ അക്ഷീണം പ്രവര്‍ത്തിച്ചതിന് ബിജെപി പ്രവര്‍ത്തകരെ ഞാന്‍ അഭിനന്ദിക്കുന്നു' എന്ന് പറഞ്ഞുകൊണ്ട്, താഴേത്തട്ടില്‍ പാര്‍ട്ടി പ്രവര്‍ത്തകര്‍ നടത്തുന്ന പരിശ്രമങ്ങളെയും അദ്ദേഹം പ്രശംസിച്ചു.