'ഇന്ത്യ ജനാധിപത്യത്തിന്റെ മാതാവാണ്': കോമൺ‌വെൽത്ത് സ്പീക്കേഴ്‌സ് യോഗത്തിൽ പ്രധാനമന്ത്രി മോദി

ഡല്‍ഹി: ഇന്ത്യ 'ജനാധിപത്യത്തിന്റെ മാതാവ്' എന്നറിയപ്പെടുന്നുവെന്ന് കോമണ്‍വെല്‍ത്തിലെ സ്പീക്കര്‍മാരുടെയും പ്രിസൈഡിംഗ് ഓഫീസര്‍മാരുടെയും സമ്മേളനത്തെ അഭിസംബോധന ചെയ്ത് പ്രധാനമന്ത്രി നരേന്ദ്ര മോദി പറഞ്ഞു.

ജനാധിപത്യ സ്ഥാപനങ്ങള്‍ക്കും പ്രക്രിയകള്‍ക്കും സ്ഥിരത, വേഗത, വ്യാപ്തി എന്നിവ നല്‍കാന്‍ കഴിയുമെന്ന് ഇന്ത്യ തെളിയിച്ചിട്ടുണ്ടെന്ന് അദ്ദേഹം പറഞ്ഞു.

2024 ലെ പൊതുതെരഞ്ഞെടുപ്പിനെ പരാമര്‍ശിച്ചുകൊണ്ട്, മനുഷ്യ ചരിത്രത്തിലെ ഏറ്റവും വലിയ ജനാധിപത്യ പ്രക്രിയയാണിതെന്ന് പ്രധാനമന്ത്രി മോദി പറഞ്ഞു. 8,000-ത്തിലധികം സ്ഥാനാര്‍ത്ഥികളും 700-ലധികം രാഷ്ട്രീയ പാര്‍ട്ടികളും വോട്ടെടുപ്പില്‍ പങ്കെടുത്തതായി അദ്ദേഹം ചൂണ്ടിക്കാട്ടി.

തെരഞ്ഞെടുപ്പില്‍ സ്ത്രീ വോട്ടര്‍മാരുടെ ശക്തമായ പങ്കാളിത്തം രേഖപ്പെടുത്തിയതായി പ്രധാനമന്ത്രി പറഞ്ഞു. ഇന്ത്യയിലെ സ്ത്രീകള്‍ പങ്കെടുക്കുക മാത്രമല്ല, നേതൃത്വം നല്‍കുകയും ചെയ്യുന്നുണ്ടെന്ന് അദ്ദേഹം കൂട്ടിച്ചേര്‍ത്തു.

ഇന്ത്യയ്ക്ക് ഒരു വനിതാ രാഷ്ട്രപതിയും ഡല്‍ഹിയില്‍ ഒരു വനിതാ മുഖ്യമന്ത്രിയും രാജ്യമെമ്പാടുമായി ഏകദേശം 15 ലക്ഷം തിരഞ്ഞെടുക്കപ്പെട്ട വനിതാ പ്രതിനിധികളുമുണ്ട്.

വൈവിധ്യം കൊണ്ട് സമ്പന്നമാണ് ഇന്ത്യയുടെ ജനാധിപത്യമെന്നും രാജ്യത്തുടനീളം നൂറുകണക്കിന് ഭാഷകള്‍ സംസാരിക്കപ്പെടുന്നുവെന്നും പ്രധാനമന്ത്രി മോദി പറഞ്ഞു. ആഴത്തിലുള്ള വേരുകള്‍ താങ്ങിനിര്‍ത്തുന്ന ഒരു വലിയ വൃക്ഷം പോലെ, ഇന്ത്യയിലെ ജനാധിപത്യത്തിന് ശക്തമായ അടിത്തറയുള്ളതിനാലാണ് ഈ വൈവിധ്യം ആഘോഷിക്കപ്പെടുന്നതെന്ന് അദ്ദേഹം പറഞ്ഞു.