ഇന്ത്യയിലെ പുതിയ തലമുറ ബിജെപിയുടെ വികസന മാതൃകയിൽ വിശ്വസിക്കുന്നു. മഹാരാഷ്ട്ര മുനിസിപ്പൽ തിരഞ്ഞെടുപ്പ് വിജയം ചൂണ്ടിക്കാട്ടി പ്രധാനമന്ത്രി മോദി. ബംഗാൾ സർക്കാർ കേന്ദ്രഫണ്ട് കൊള്ളയടിക്കുന്നുവെന്നും ടിഎംസിയെ അധികാരത്തിൽ നിന്ന് പുറത്താക്കാൻ സമയമായെന്നും മോദി

ഡൽഹി: ഇന്ത്യയിലെ പുതിയ തലമുറ ബിജെപിയുടെ വികസന മാതൃകയിൽ വിശ്വസിക്കുന്നുവെന്ന് പ്രധാനമന്ത്രി നരേന്ദ്ര മോദി. മഹാരാഷ്ട്രയിലെ മുനിസിപ്പൽ തിരഞ്ഞെടുപ്പ് വിജയം അദ്ദേഹം ഉദാഹരണമായി ചൂണ്ടിക്കാട്ടി.

ബംഗാളിൽ നടക്കുന്ന നിയമസഭാ തെരഞ്ഞെടുപ്പിൽ തൃണമൂൽ കോൺഗ്രസിനെ അധികാരത്തിൽ നിന്ന് മാറ്റണമെന്ന് മോദി ആവശ്യപ്പെട്ടു.

ബംഗാൾ സർക്കാർ കേന്ദ്രം നൽകുന്ന വികസന ഫണ്ടുകൾ ദുരുപയോഗം ചെയ്യുന്നുവെന്ന് അദ്ദേഹം ആരോപിച്ചു. പാവപ്പെട്ട കുടുംബങ്ങൾക്ക് വീട്, സൗജന്യ റേഷൻ, കേന്ദ്ര ക്ഷേമപദ്ധതികളുടെ ഗുണങ്ങൾ എന്നിവ ലഭിക്കുന്നില്ലെന്നും സംസ്ഥാനതല അഴിമതിയാണ് കാരണം എന്നും മോദി പറഞ്ഞു.

കേന്ദ്ര ആരോഗ്യ പദ്ധതികൾ ബംഗാൾ സർക്കാർ തടയുന്നതായും, ആയുഷ്മാൻ ഭാരത് നടപ്പാക്കാത്ത ഏക സംസ്ഥാനമാണ് പശ്ചിമ ബംഗാളെന്നും അദ്ദേഹം പറഞ്ഞു. ബംഗാളിൽ നല്ല ഭരണത്തിനുള്ള സമയം വന്നതായും ബിജെപി അത് സാധ്യമാക്കുമെന്നും പ്രധാനമന്ത്രി വ്യക്തമാക്കി.