'മുസ്ലീങ്ങൾക്കും ആർ‌എസ്‌എസിൽ ചേരാം, പക്ഷേ....'; നിലപാട് വ്യക്തമാക്കി ആർ‌എസ്‌എസ് മേധാവി

ഡല്‍ഹി: ഒരു രാഷ്ട്രീയ പാര്‍ട്ടിയെയും സംഘം പിന്തുണയ്ക്കുന്നില്ലെന്നും നയങ്ങളെ മാത്രമേ പിന്തുണയ്ക്കുന്നുള്ളൂവെന്നും ആര്‍എസ്എസ് മേധാവി മോഹന്‍ ഭാഗവത്. 

സംഘത്തിന്റെ ചിന്ത എല്ലാവരെയും ഉള്‍ക്കൊള്ളുന്നതാണെന്നും ഇതാണ് അതിന്റെ പ്രവര്‍ത്തന ശൈലിയെന്നും അദ്ദേഹം പറഞ്ഞു. ആര്‍എസ്എസ് സ്ഥാപക വാര്‍ഷികത്തോടനുബന്ധിച്ച് നടന്ന ഒരു പരിപാടിയില്‍ സംസാരിക്കുകയായിരുന്നു മോഹന്‍ ഭാഗവത്.

'മുസ്ലീങ്ങളും ക്രിസ്ത്യാനികളും ഹിന്ദുക്കളും ആര്‍എസ്എസ് ശാഖകളില്‍ വരുന്നു. പക്ഷേ നമ്മള്‍ ഒരിക്കലും ആരാണെന്ന് ചോദിക്കാറില്ല. നാമെല്ലാവരും ഭാരത മാതാവിന്റെ മക്കളാണ്.'

മുസ്ലീങ്ങള്‍ക്ക് ആര്‍എസ്എസില്‍ ചേരാന്‍ അനുവാദമുണ്ടോ എന്ന് ചോദിച്ചപ്പോള്‍, ജാതി, മതം, വിഭാഗം എന്നിവയുടെ അടിസ്ഥാനത്തില്‍ സംഘത്തില്‍ യാതൊരു നിയന്ത്രണങ്ങളുമില്ലെന്ന് മോഹന്‍ ഭാഗവത് പറഞ്ഞു. 

ഒരു ബ്രാഹ്‌മണനെയും സംഘത്തില്‍ പ്രത്യേകം അംഗീകരിക്കുന്നില്ല, മറ്റൊരു ജാതിയെയും പ്രത്യേകം അംഗീകരിക്കുന്നില്ല. ഒരു മുസ്ലീമിനെയും അനുവദനീയമായ അടിസ്ഥാനത്തില്‍ പ്രവേശിപ്പിക്കുന്നില്ല, ഒരു ക്രിസ്ത്യാനിയെയും സംഘത്തില്‍ പ്രത്യേക സ്വത്വത്തോടെ അംഗീകരിക്കുന്നില്ല. ആളുകളെ ഹിന്ദുക്കളായി മാത്രമേ അംഗീകരിക്കുന്നുള്ളൂവെന്നും അദ്ദേഹം പറഞ്ഞു.