മുര്‍ഷിദാബാദില്‍ ബാബറി മസ്ജിദ് മാതൃകയില്‍ ഒരു പള്ളി നിര്‍മ്മിക്കാനുള്ള നീക്കം മുസ്ലീങ്ങളുടെ നേട്ടത്തിനു വേണ്ടിയല്ല, മറിച്ച് തിരഞ്ഞെടുപ്പ് നേട്ടങ്ങള്‍ക്കായി പഴയ തര്‍ക്കങ്ങള്‍ പുനരുജ്ജീവിപ്പിക്കാന്‍ ലക്ഷ്യമിട്ടുള്ള ഒരു രാഷ്ട്രീയ ഗൂഢാലോചനയാണെന്ന് മോഹന്‍ ഭാഗവത്

കൊല്‍ക്കത്ത: പശ്ചിമ ബംഗാളിലെ മുര്‍ഷിദാബാദ് ജില്ലയില്‍ ബാബറി മസ്ജിദ് മാതൃകയില്‍ ഒരു പള്ളി നിര്‍മ്മിക്കാനുള്ള നീക്കം മുസ്ലീങ്ങളുടെ നേട്ടത്തിനു വേണ്ടിയല്ല, മറിച്ച് തിരഞ്ഞെടുപ്പ് നേട്ടങ്ങള്‍ക്കായി പഴയ തര്‍ക്കങ്ങള്‍ പുനരുജ്ജീവിപ്പിക്കാന്‍ ലക്ഷ്യമിട്ടുള്ള ഒരു 'രാഷ്ട്രീയ ഗൂഢാലോചന' എന്ന് ആര്‍എസ്എസ് മേധാവി മോഹന്‍ ഭാഗവത്.

പശ്ചിമ ബംഗാളില്‍ നിര്‍ദ്ദിഷ്ട നിര്‍മ്മാണവുമായി ബന്ധപ്പെട്ട് രാഷ്ട്രീയ വിവാദങ്ങള്‍ വളര്‍ന്നുവരുന്നതിനിടെയാണ് ഭഗവതിന്റെ പരാമര്‍ശം. ഭരണകക്ഷിയായ ടിഎംസി വര്‍ഗീയ ധ്രുവീകരണത്തിന് ശ്രമിക്കുകയാണെന്ന് പ്രതിപക്ഷം ആരോപിച്ചു. ടിഎംസി എംഎല്‍എ ഹുമയൂണ്‍ കബീറിനെ സസ്പെന്‍ഡ് ചെയ്തതിനെത്തുടര്‍ന്ന് സംസ്ഥാന ഭരണകക്ഷി ഈ നീക്കത്തില്‍ നിന്ന് അകലം പാലിക്കാന്‍ ശ്രമിച്ചു.

'ബാബറി മസ്ജിദ് പുനര്‍നിര്‍മ്മിച്ചുകൊണ്ട് തര്‍ക്കം പുനരാരംഭിക്കാനുള്ള രാഷ്ട്രീയ ഗൂഢാലോചനയാണിത്. ഇത് വോട്ടിന് വേണ്ടിയാണ് ചെയ്യുന്നത്; ഇത് മുസ്ലീങ്ങളുടെയോ ഹിന്ദുക്കളുടെയോ നേട്ടത്തിനുവേണ്ടിയല്ല. ഇത് സംഭവിക്കരുത്. അതാണ് ഞാന്‍ കരുതുന്നത്,' അദ്ദേഹം പറഞ്ഞു.

സര്‍ക്കാര്‍ പണം ഉപയോഗിച്ച് മതപരമായ സ്ഥലങ്ങള്‍ നിര്‍മ്മിക്കുന്നത് ശരിയാണോ എന്ന് ചോദിച്ചപ്പോള്‍ അദ്ദേഹം പറഞ്ഞു, 'സര്‍ക്കാര്‍ ക്ഷേത്രങ്ങളോ മതപരമായ സ്ഥലങ്ങളോ നിര്‍മ്മിക്കരുത്. അതാണ് നിയമം. സോമനാഥ ക്ഷേത്രം നിര്‍മ്മിച്ചു. ആ സമയത്ത് സര്‍ദാര്‍ വല്ലഭായ് പട്ടേല്‍ ആഭ്യന്തര മന്ത്രിയായിരുന്നു.

രാഷ്ട്രപതി ഉദ്ഘാടനത്തില്‍ പങ്കെടുത്തു, പക്ഷേ സര്‍ക്കാര്‍ പണം ഉപയോഗിച്ചില്ല. സുപ്രീം കോടതി വിധിക്ക് ശേഷമാണ് രാമക്ഷേത്രം നിര്‍മ്മിച്ചത്. സര്‍ക്കാരിനോട് ഒരു ട്രസ്റ്റ് രൂപീകരിക്കാന്‍ ആവശ്യപ്പെട്ടു, അവര്‍ അത് ചെയ്തു. സര്‍ക്കാര്‍ പണം നല്‍കിയില്ല. ഞങ്ങള്‍ എല്ലാവരും സംഭാവന നല്‍കി.'

1992ല്‍ അയോധ്യയിലെ ബാബറി മസ്ജിദ് പൊളിച്ചുമാറ്റിയ ദിവസം, ഡിസംബര്‍ 6-ന്, സസ്പെന്‍ഡ് ചെയ്യപ്പെട്ട തൃണമൂല്‍ കോണ്‍ഗ്രസ് എംഎല്‍എ ഹുമയൂണ്‍ കബീര്‍ ബെല്‍ദംഗയില്‍ ബാബറി മസ്ജിദ് മാതൃകയിലുള്ള പള്ളിക്ക് തറക്കല്ലിട്ടു. 

പതിനായിരക്കണക്കിന് ആളുകളാണ് ശിലാസ്ഥാപന ചടങ്ങില്‍ പങ്കെടുത്തത്. ഏകദേശം 40,000 പേര്‍ക്ക് ഷാഹി ബിരിയാണി വിതരണം ചെയ്യുന്നതുള്‍പ്പെടെ വിപുലമായ ക്രമീകരണങ്ങള്‍ ചെയ്തു. അന്ന് വേദിയില്‍ പതിനൊന്ന് വലിയ സ്റ്റെയിന്‍ലെസ് സ്റ്റീല്‍ സംഭാവന പെട്ടികള്‍ സ്ഥാപിച്ചിരുന്നു.

പള്ളിയുടെ നിര്‍മ്മാണത്തിനായി സംഭാവന നല്‍കാന്‍ കബീര്‍ ആളുകളോട് അഭ്യര്‍ത്ഥിച്ചു. ശിലാസ്ഥാപന ചടങ്ങ് രൂക്ഷമായ രാഷ്ട്രീയ പ്രതികരണങ്ങള്‍ക്ക് കാരണമായി.

മുഖ്യമന്ത്രി മമത ബാനര്‍ജി 'വര്‍ഗീയ പ്രീണനം' അനുവദിച്ചുവെന്ന് ബിജെപി ആരോപിച്ചു, അതേസമയം അടുത്ത വര്‍ഷത്തെ നിയമസഭാ തെരഞ്ഞെടുപ്പിന് മുന്നോടിയായി മേഖലയെ ധ്രുവീകരിക്കാന്‍ ബിജെപിയുടെ പിന്തുണയോടെയാണ് മുഴുവന്‍ സംഭവവും ആസൂത്രണം ചെയ്തതെന്ന് ടിഎംസി ആരോപിച്ചു.