അർദ്ധസൈനിക വിഭാഗമല്ല, ആർ‌എസ്‌എസിനെ ബിജെപിയുടെ കണ്ണിലൂടെ വിലയിരുത്തരുത്: മോഹൻ ഭാഗവത്

ഡല്‍ഹി: യൂണിഫോമും വ്യായാമവും ഉണ്ടെങ്കിലും, സംഘം ഒരു അര്‍ദ്ധസൈനിക വിഭാഗമല്ലെന്നും ബിജെപിയുടെ കണ്ണിലൂടെ അതിനെ മനസ്സിലാക്കാന്‍ ശ്രമിക്കുന്നത് വലിയ തെറ്റാണെന്നും ആര്‍എസ്എസ് മേധാവി മോഹന്‍ ഭഗവത്.

ഇന്ത്യ വീണ്ടും ഒരു വിദേശ ശക്തിയുടെ പിടിയില്‍ അകപ്പെടാതിരിക്കാന്‍ സമൂഹത്തെ ഒന്നിപ്പിക്കുന്നതിനും ആവശ്യമായ ഗുണങ്ങളും സദ്ഗുണങ്ങളും അതില്‍ നിറയ്ക്കുന്നതിനുമാണ് രാഷ്ട്രീയ സ്വയംസേവക സംഘം പ്രവര്‍ത്തിക്കുന്നതെന്ന് അദ്ദേഹം പറഞ്ഞു. 

'ഞങ്ങള്‍ യൂണിഫോം ധരിക്കുന്നു, മാര്‍ച്ച് നടത്തുന്നു, സ്റ്റിക്ക് വ്യായാമം ചെയ്യുന്നു. ആരെങ്കിലും ഇതൊരു അര്‍ദ്ധസൈനിക സംഘടനയാണെന്ന് കരുതുന്നുവെങ്കില്‍, അത് ഒരു തെറ്റായിരിക്കും. സംഘത്തെ മനസ്സിലാക്കാന്‍ പ്രയാസമായിരുന്നു, കാരണം അത് ഒരു സവിശേഷ സംഘടനയാണ്.' അദ്ദേഹം പറഞ്ഞു. 

'ബിജെപിയെ നോക്കി സംഘത്തെ മനസ്സിലാക്കാന്‍ നോക്കിയാല്‍ അത് വലിയൊരു തെറ്റായിരിക്കും. ആര്‍എസ്എസ് അനുകൂല സംഘടനയായ വിദ്യാഭാരതിയെ നോക്കി മനസ്സിലാക്കാന്‍ ശ്രമിച്ചാലും ഇതേ തെറ്റ് സംഭവിക്കും' അദ്ദേഹം പറഞ്ഞു.

ജനസംഘത്തിന്റെയും ഭരണകക്ഷിയായ ഭാരതീയ ജനതാ പാര്‍ട്ടിയുടെയും മാതൃസംഘടനയായി ആര്‍എസ്എസ് വ്യാപകമായി കണക്കാക്കപ്പെടുന്ന സാഹചര്യത്തിലാണ് ആര്‍എസ്എസ് മേധാവിയുടെ പരാമര്‍ശം.