മോൻത ചുഴലിക്കാറ്റ്: 60-ലധികം ട്രെയിനുകൾ റദ്ദാക്കി റെയിൽവേ; വിമാന സർവീസുകളും തടസപ്പെട്ടു

ന്യൂഡൽഹി: മോൻതാ ചുഴലിക്കാറ്റ് ആന്ധ്രാപ്രദേശ് തീരം തൊടാനിരിക്കെ സുരക്ഷാ നടപടികളുടെ ഭാഗമായി ഈസ്റ്റ് കോസ്റ്റ് റെയിൽവേയും (ഇസിഒആർ) സൗത്ത് സെൻട്രൽ റെയിൽവേയും 650 ലധികം ട്രെയിനുകൾ റദ്ദാക്കി.

മോൻത ചുഴലിക്കാറ്റിന്റെ പശ്ചാത്തലത്തിൽ, സുരക്ഷാ കാരണങ്ങളാൽ നിരവധി ട്രെയിൻ സർവീസുകൾ റദ്ദാക്കിയതായും യാത്രക്കാർ യാത്ര ആരംഭിക്കുന്നതിന് മുമ്പ് ട്രെയിൻ സ്റ്റാറ്റസ് പരിശോധിക്കണമെന്നും ഈസ്റ്റ് കോസ്റ്റ് റെയിൽവേ അറിയിച്ചു.

അതേസമയം, ഇന്നും നാളെയുമായി ഏകദേശം 67 ട്രെയിനുകൾ റദ്ദാക്കിയതായി സൗത്ത് സെൻട്രൽ റെയിൽവേ അറിയിച്ചു.

ടാറ്റാനഗർ-എറണാകുളം എക്സ്പ്രസ് (ട്രെയിൻ നമ്പർ 18189) ചൊവ്വാഴ്ച ടിറ്റ്‌ലഗഢ്, ലഖോലി, റായ്പൂർ, നാഗ്പൂർ, ബൽഹർഷ വഴി തിരിച്ചുവിടുമെന്നും അറിയിച്ചിട്ടുണ്ട്.

മോൻത ചുഴലിക്കാറ്റിന്റെ പശ്ചാത്തലത്തിൽ, വിജയവാഡ, വിശാഖപട്ടണം, രാജമുണ്ട്രി എന്നിവിടങ്ങളിലേക്കുള്ള സർവീസുകൾ ബാധിച്ചതായി നിരവധി വിമാനക്കമ്പനികൾ അറിയിച്ചു. ഇന്ത്യയിലെ മുൻനിര എയർലൈനുകളിൽ ഒന്നായ ഇൻഡിഗോ, വിമാനത്താവളത്തിലേക്ക് പോകുന്നതിനുമുമ്പ് എല്ലാ ഉപഭോക്താക്കളോടും അവരുടെ വിമാന നില പരിശോധിക്കാൻ നിർദ്ദേശിച്ചു. 

മോൻത ചുഴലിക്കാറ്റ് ഇന്ന് കര തൊടും.വൈകീട്ടോടെ ആന്ധ്രാ തീരത്തെ മച്ചിലിപട്ടണത്തിനും കലിംഗ പട്ടണത്തിനും ഇടയിൽ കക്കിനടയുടെ സമീപം കര തൊടുമെന്നാണ് കാലാവസ്ഥാ പ്രവചനം.

 ഇതേത്തുടർന്ന് ആന്ധ്ര തീരത്ത് കനത്ത ജാഗ്രത തുടരുകയാണ്.

ജനങ്ങളോട് വീടിനുള്ളിൽ തന്നെ തുടരാനും സുരക്ഷാ നിർദേശങ്ങൾ പാലിക്കാനും ആന്ധ്രപ്രദേശ് സംസ്ഥാന ദുരന്ത നിവാരണ അതോറിറ്റി നിർദേശം നൽകിയിട്ടുണ്ട്. 

മണിക്കൂറിൽ 90 മുതൽ 110 കിലോമീറ്റർ വരെ വേഗതയിൽ കാറ്റ് വീശാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകിയിട്ടുണ്ട്.