കൊതുകിനെ തുരത്താൻ എഐ; പദ്ധതിയുമായി ആന്ധ്രാ സർക്കാർ

ഹൈദരാബാദ്: കൊതുകു ശല്യം നിയന്ത്രിക്കാൻ കൃത്രിമബുദ്ധിയുടെ സഹായം ഉപയോഗിച്ച് ആന്ധ്രാപ്രദേശ് സർക്കാർ പുതിയ പദ്ധതി ആരംഭിക്കുന്നു.

"സ്മാർട്ട് മോസ്ക്വിറ്റോ സർവൈലൻസ് സിസ്റ്റം" എന്ന പേരിൽ, വിശാഖപട്ടണം, വിജയവാഡ, കാക്കിനട, രാജമഹേന്ദ്രവാരം, നെല്ലൂർ, കർണൂൽ എന്നീ ആറു മുനിസിപ്പൽ കോർപ്പറേഷനുകളിലെ 66 സ്ഥലങ്ങളിൽ പദ്ധതി നടപ്പാക്കാനാണ് സർക്കാർ തയ്യാറെടുക്കുന്നത്.

മുനിസിപ്പൽ അഡ്മിനിസ്ട്രേഷൻ ഡയറക്ടർ പി. സമ്പത്ത് കുമാറിന്റെ നേതൃത്വത്തിലാണ് പദ്ധതി നടപ്പാക്കുന്നത്.

കൊതുകുകളുടെ എണ്ണം കൂടുതൽ കാര്യക്ഷമമായി നിരീക്ഷിക്കുകയും, സമയബന്ധിതമായി നിയന്ത്രണ നടപടികൾ സ്വീകരിക്കുകയും ചെയ്യാൻ ഈ എഐ അടിസ്ഥാനമാക്കിയ സംവിധാനത്തിന് കഴിയും.

മഴക്കാലത്ത് ഡെങ്കിപ്പനി, മലേറിയ തുടങ്ങിയ രോഗങ്ങൾ സംസ്ഥാനത്ത് വ്യാപകമായി റിപ്പോർട്ട് ചെയ്യപ്പെടുന്ന സാഹചര്യത്തിലാണ് ഈ പുതിയ സംരംഭം. 2024-ൽ ആന്ധ്രയിൽ 5,555 ഡെങ്കിപ്പനി കേസുകളും, 2023-ൽ 6,453 കേസുകളും റിപ്പോർട്ട് ചെയ്തിരുന്നു.

പദ്ധതി വിജയകരമാകുമെന്ന പ്രതീക്ഷയിലാണ് മുനിസിപ്പൽ അഡ്മിനിസ്ട്രേഷൻ ആൻഡ് അർബൻ ഡെവലപ്മെന്റ് വകുപ്പ്.