ദിമാ ഹസാവോ കല്‍ക്കരി ഖനി ദുരന്തം എസ്ഐടി അന്വേഷിക്കണമെന്ന് ഗൗരവ് ഗൊഗോയ് എംപി

ഡല്‍ഹി: അസാമിലെ ദിമാ ഹസാവോയിലുണ്ടായ ദാരുണമായ കല്‍ക്കരി ഖനി ദുരന്തം അന്വേഷിക്കാന്‍ പ്രത്യേക അന്വേഷണ സംഘം (എസ്ഐടി) രൂപീകരിക്കണമെന്ന് ജോര്‍ഹട്ട് എംപി ഗൗരവ് ഗൊഗോയ് ആവശ്യപ്പെട്ടു.

2025 ജനുവരി 6 ന് ഖനിയില്‍ വെള്ളം കയറിയാണ് ദുരന്തം. നിരവധി തൊഴിലാളികളാണ് ഖനിയില്‍ കുടുങ്ങിയത്. 

പ്രധാനമന്ത്രി നരേന്ദ്ര മോദിക്ക് അയച്ച കത്തില്‍ അസമിലെ അനധികൃത ഖനനത്തിന്റെ പ്രശ്‌നം ഗൊഗോയ് എടുത്തുകാണിച്ചു

2014-ല്‍ ദേശീയ ഹരിത ട്രൈബ്യൂണല്‍ നിരോധനം ഏര്‍പ്പെടുത്തിയിട്ടും, ഈ അപകടകരമായ പ്രവര്‍ത്തനങ്ങള്‍ ഇപ്പോഴും തഴച്ചുവളരുന്നുവെന്നും അദ്ദേഹം ചൂണ്ടിക്കാട്ടി.

അസമിലെ ഡിഗ്ബോയ് ഫോറസ്റ്റ് ഡിവിഷനിലെ അനധികൃത ഖനന പ്രവര്‍ത്തനങ്ങള്‍ വെളിപ്പെടുത്തിയ ജസ്റ്റിസ് ബ്രോജേന്ദ്ര പ്രസാദ് കടാകേയുടെ നേതൃത്വത്തിലുള്ള 2021 ലെ ജുഡീഷ്യല്‍ കമ്മീഷന്റെ കണ്ടെത്തലുകളും അദ്ദേഹം ചൂണ്ടിക്കാട്ടി.

ഉംറാങ്സോ, കര്‍ബി ആംഗ്ലോങ് തുടങ്ങിയ പ്രദേശങ്ങളില്‍ അനധികൃത കല്‍ക്കരി ഖനനം വ്യാപകമാണെന്നും, പ്രാദേശിക ഓപ്പറേറ്റര്‍മാര്‍ അധികാരികളുടെ നിരീക്ഷണത്തിലാണ് ഈ പ്രവര്‍ത്തനങ്ങള്‍ നടത്തുന്നതെന്നും എംപി ചൂണ്ടിക്കാട്ടി

ജില്ലാ ഭരണകൂടങ്ങളുടെയും നിയമപാലകരുടെയും നിഷ്‌ക്രിയത്വം ആവര്‍ത്തിച്ചുള്ള അപകടങ്ങള്‍ക്കും ജീവഹാനിക്കും കാരണമായിട്ടുണ്ടെന്ന് അദ്ദേഹം ആരോപിച്ചു.