മുഖ്താർ അൻസാരി ആശുപത്രിയിൽ; ജയിലിൽ നിന്നും വിഷം നൽകിയെന്ന് ആരോപണം

ഡല്‍ഹി: യുപിയിലെ ബന്ദ ജയിലിൽ കഴിയുന്ന ഗുണ്ടാത്തലവൻ മുഖ്താർ അൻസാരിയെ ആരോഗ്യനില വഷളായതിനെ തുടർന്ന് ആശുപത്രിയിൽ പ്രവേശിപ്പിച്ചു. മെഡിക്കൽ കോളേജിലെ ഐസിയുവിൽ ചികിത്സയിലാണ് അദ്ദേഹമെന്നാണ് പുറത്തു വരുന്ന വിവരങ്ങൾ. എന്നാൽ അധികൃതർ മുഖ്താറിൻ്റെ ആരോഗ്യനില സംബന്ധിച്ച് തികഞ്ഞ മൗനം പാലിക്കുകയാണ്. 

മുഖ്താർ അൻസാരിയുടെ സുരക്ഷാ ക്രമീകരണങ്ങളിൽ വീഴ്ച വരുത്തിയതിന് രണ്ട് ദിവസം മുമ്പ് ഒരു ജയിലറെയും രണ്ട് ഡെപ്യൂട്ടി ജയിലർമാരെയും സസ്പെൻഡ് ചെയ്തിരുന്നു. ജയിലിൽ വെച്ച് തനിക്ക് സ്ലോ പോയിസൺ നൽകിയെന്ന് മുക്താർ അൻസാരി നേരത്തെ ആരോപിച്ചിരുന്നു. തന്റെ ആരോഗ്യം വഷളായെന്നും ഡോക്ടർമാരുടെ ഒരു ടീം രൂപീകരിച്ച് തനിക്ക് ശരിയായ ചികിത്സ നൽകണമെന്നും അദ്ദേഹം ആവശ്യപ്പെട്ടിരുന്നു.

ആരോപണത്തിന് പിന്നാലെ ഒരു ഫിസിഷ്യനും ഓർത്തോപീഡിക് സ്പെഷ്യലിസ്റ്റ് ഡോക്ടറും ഉൾപ്പെടുന്ന രണ്ട് ഡോക്ടർമാരുടെ പാനൽ ടീമിനെ മുഖ്താറിൻ്റെ പരിശോധനയ്ക്കായി കോടതി ജയിലിലേക്ക് അയച്ചു. പരിശോധനയ്ക്ക് ശേഷം സംഘം രക്തപരിശോധന നടത്തി.

ഭക്ഷണം കഴിക്കാത്തത് മൂലമാണ് ഇങ്ങനെ സംഭവിക്കുന്നതെന്ന് ഡോക്ടർമാർ ജയിൽ അധികൃതരോട് പറഞ്ഞു. നിലവിൽ ചികിത്സയിലാണ്. മുക്താർ അൻസാരിയുടെ മെഡിക്കൽ റിപ്പോർട്ട് ജയിൽ ഭരണകൂടം കോടതിയിലേക്ക് അയച്ചു.