നടൻ സൽമാൻ ഖാന് വീണ്ടും വധഭീഷണി; കൃഷ്ണമൃഗത്തെ കൊന്നുവെന്ന് സമ്മതിച്ച് ക്ഷേത്രം സന്ദർശിച്ച് മാപ്പ് പറയണ, അല്ലെങ്കിൽ അഞ്ച് കോടി രൂപ നൽകണം; പുതിയ ഭീഷണി ലോറൻസ് ബിഷ്‌ണോയി സംഘത്തിൽ നിന്നുതന്നെ

മുംബൈ: കൃഷ്ണമൃഗത്തെ കൊന്നുവെന്ന് സമ്മതിച്ച് ക്ഷേത്രം സന്ദർശിച്ച് മാപ്പ് പറയണമെന്നും അല്ലെങ്കിൽ അഞ്ച് കോടി രൂപ നൽകണമെന്നും ആവശ്യപ്പെട്ട് നടൻ സൽമാൻ ഖാന് വീണ്ടും വധഭീഷണി. പുതിയ ഭീഷണി സന്ദേശമെത്തിയത് ലോറൻസ് ബിഷ്‌ണോയി സംഘത്തിൽ നിന്നാണ്. 

സൽമാൻ ഖാൻ അങ്ങനെ ചെയ്തില്ലെങ്കിൽ കൊല്ലപ്പെടുമെന്ന് തിങ്കളാഴ്ച ഗുണ്ടാസംഘം ലോറൻസ് ബിഷ്‌ണോയിയുടെ സഹോദരനെന്ന് അവകാശപ്പെടുന്ന ഒരാളിൽ നിന്ന് സന്ദേശം ലഭിച്ചതായി മുംബൈ പോലീസിൻ്റെ ട്രാഫിക് കൺട്രോൾ യൂണിറ്റ് അറിയിച്ചു.

സൽമാൻ ഖാൻ ജീവിച്ചിരിക്കണമെങ്കിൽ അദ്ദേഹം ഞങ്ങളുടെ ക്ഷേത്രത്തിൽ പോയി മാപ്പ് പറയണം അല്ലെങ്കിൽ അഞ്ച് കോടി രൂപ നൽകണം. അങ്ങനെ ചെയ്തില്ലെങ്കിൽ ഞങ്ങൾ അവരെ കൊല്ലും; ഞങ്ങളുടെ സംഘം ഇപ്പോഴും സജീവമാണ്," സന്ദേശത്തിൽ പറയുന്നു. കൂടുതൽ അന്വേഷണം നടക്കുകയാണെന്നും സന്ദേശം അയച്ചയാളെ കണ്ടെത്താനുള്ള തിരച്ചിൽ തുടരുകയാണെന്നും പോലീസ് അറിയിച്ചു.

മഹാരാഷ്ട്ര മുൻ മന്ത്രി ബാബ സിദ്ദിഖിൻ്റെ കൊലപാതകത്തെ തുടർന്ന് താരത്തിൻ്റെ സുരക്ഷ വർധിപ്പിച്ചിരുന്നു. രണ്ട് കോടി രൂപ മോചനദ്രവ്യം ആവശ്യപ്പെട്ട് ഒക്‌ടോബർ 30ന് അജ്ഞാതനിൽ നിന്ന് സൽമാന് സമാനമായ വധഭീഷണി ഉണ്ടായിരുന്നു.