വൈദ്യുതി ബന്ധം തകരാറിലായി. മുംബൈ മോണോറെയിലിനുള്ളിൽ കുടുങ്ങിയ യാത്രക്കാരെ നാല് മണിക്കൂർ നീണ്ടുനിന്ന രക്ഷാപ്രവർത്തനത്തിൽ രക്ഷപ്പെടുത്തി

മുംബൈ: ചൊവ്വാഴ്ച വൈകുന്നേരം മൈസൂര്‍ പാര്‍ക്ക് കോളനിക്ക് സമീപം വൈദ്യുതി ബന്ധം തകരാറിലായതിനെ തുടര്‍ന്ന് നിലച്ച മുംബൈ മോണോറെയിലിനുള്ളില്‍ കുടുങ്ങിയ യാത്രക്കാരെ ഏകദേശം നാല് മണിക്കൂര്‍ നീണ്ടുനിന്ന രക്ഷാപ്രവര്‍ത്തനത്തില്‍ അഗ്‌നിശമന സേനയും ബ്രിഹന്‍മുംബൈ മുനിസിപ്പല്‍ കോര്‍പ്പറേഷനും ചേര്‍ന്ന് രക്ഷപ്പെടുത്തി. ശേഷം അവര്‍ ക്യാമറയ്ക്ക് മുന്നില്‍ തങ്ങള്‍ അനുഭവിച്ച ദുരിതം പങ്കുവെച്ചു.

മോണോറെയിലിനുള്ളില്‍ കുടുങ്ങിയ 582 യാത്രക്കാരെയും രക്ഷപ്പെടുത്തി. രക്ഷപ്പെടുത്തിയ ശേഷം 12 യാത്രക്കാര്‍ക്ക് ശ്വാസതടസ്സം അനുഭവപ്പെട്ടു, അവരെ ആശുപത്രിയില്‍ പ്രവേശിപ്പിച്ചു. അവരുടെ ആരോഗ്യനില തൃപ്തികരമാണെന്നും ഉടന്‍ തന്നെ അവരെ വിട്ടയച്ചേക്കുമെന്നും ഉദ്യോഗസ്ഥര്‍ പറഞ്ഞു.

മോണോറെയിലിനുള്ളിലെ സ്ഥിതി ശ്വാസംമുട്ടുന്നതായും പ്രായമായവരെയും കുട്ടികളെയുമാണ് ഏറ്റവും കൂടുതല്‍ ബാധിച്ചതെന്നും യാത്രക്കാര്‍ അവകാശപ്പെട്ടു.

''അത് ഭയങ്കരമായിരുന്നു. സുരക്ഷാ ഉദ്യോഗസ്ഥര്‍ ആരും വന്നില്ല. ഞങ്ങള്‍ എല്ലാവരും ഭയന്നുപോയി. കൂടുതല്‍ ആളുകളെ ട്രെയിനില്‍ കയറ്റുന്നതിലാണ് അവര്‍ കൂടുതല്‍ ശ്രദ്ധ കേന്ദ്രീകരിച്ചത്. ധാരാളം ആളുകളുണ്ടായിരുന്നു, ട്രെയിന്‍ നിറഞ്ഞിരുന്നു.'' രക്ഷപ്പെട്ട ശേഷം ഒരു വൃദ്ധ യാത്രക്കാരന്‍ പറഞ്ഞു.

30 മിനിറ്റ് ഇടവേളയ്ക്ക് ശേഷം എത്തിയ ട്രെയിന്‍ യാത്രക്കാരെ കൊണ്ട് നിറഞ്ഞിരുന്നുവെന്നും യാത്രക്കാര്‍ അവകാശപ്പെട്ടു.

'വൈകുന്നേരം 5.30 മുതല്‍ ഞാന്‍ ട്രെയിനില്‍ ഉണ്ടായിരുന്നു. ഒരു മണിക്കൂറിന് ശേഷമാണ് രക്ഷാപ്രവര്‍ത്തനം ആരംഭിച്ചത്. ട്രെയിനില്‍ കുറഞ്ഞത് 500 യാത്രക്കാരുണ്ടായിരുന്നു.

30 മിനിറ്റ് ഇടവേളയ്ക്ക് ശേഷമാണ് ഈ ട്രെയിന്‍ എത്തിയത്, അതിനാല്‍ മുഴുവന്‍ ട്രെയിന്‍ യാത്രക്കാരെ കൊണ്ട് നിറഞ്ഞിരുന്നു,' ഒരു യാത്രക്കാരന്‍ പറഞ്ഞു.