ഹിന്ദു കുടുംബങ്ങളെ ലക്ഷ്യം വച്ചും കടകള്‍ കൊള്ളയടിച്ചും കലാപകാരികള്‍ അഴിഞ്ഞാടി. ഹിന്ദുക്കള്‍ ജീവനും കൊണ്ട് പലായനം ചെയ്തു. മുര്‍ഷിദാബാദ് കത്തിയെരിഞ്ഞിട്ടും സര്‍ക്കാരിന് മിണ്ടാട്ടമില്ല. മമത മൗനം പാലിക്കുന്നത് എന്തുകൊണ്ട്?

കൊല്‍ക്കത്ത: 2025 ലെ വഖഫ് ഭേദഗതി നിയമത്തിനെതിരായി ഇന്ത്യയിലെ വിവിധ നഗരങ്ങളില്‍ പ്രതിഷേധങ്ങള്‍ പൊട്ടിപ്പുറപ്പെട്ടു. പശ്ചിമ ബംഗാളിലെ മുര്‍ഷിദാബാദില്‍ നിന്നാണ് കൂടുതല്‍ അക്രമസംഭവങ്ങള്‍ റിപ്പോര്‍ട്ട് ചെയ്യപ്പെട്ടത്.

അവിടെ ഹിന്ദു കുടുംബങ്ങളെ ലക്ഷ്യം വച്ചും, കടകള്‍ കൊള്ളയടിച്ചും, വെള്ളിയാഴ്ച പ്രാര്‍ത്ഥനയ്ക്ക് ശേഷം ഒരു വിഭാഗം കലാപം നടത്തിയപ്പോള്‍ ഹിന്ദുക്കള്‍ പലായനത്തിന് നിര്‍ബന്ധിതരായി. ഹിന്ദുക്കളെ വീടുകളില്‍ നിന്ന് പുറത്താക്കുമ്പോള്‍ തൃണമൂല്‍ കോണ്‍ഗ്രസ് കണ്ണടച്ചിരിക്കുകയാണെന്ന് ബിജെപി ആരോപിച്ചു.

കല്ലെറിയല്‍, തീവയ്പ്പ്, ഹിന്ദുക്കള്‍ക്കെതിരായ ഭീഷണികള്‍ എന്നിവ തെരുവുകളില്‍ പ്രതിധ്വനിച്ചു. ഇതുവരെ കുറഞ്ഞത് 150 പേരെ അറസ്റ്റ് ചെയ്തിട്ടുണ്ട്, പക്ഷേ സംഘര്‍ഷം ഇപ്പോഴും നിലനില്‍ക്കുന്നു. ബംഗാള്‍ സംഘര്‍ഷത്തില്‍ മൂന്നോളം പേര്‍ക്ക് ജീവന്‍ നഷ്ടമാവുകയും ചെയ്തിരുന്നു.

വഖഫ് ഭേദഗതി നിയമവുമായി ബന്ധപ്പെട്ട് രാജ്യത്ത് വിവിധ ഇടങ്ങളില്‍ നടക്കുന്ന പ്രതിഷേധങ്ങളില്‍ ഇതുവരെയും അയവ് വന്നിട്ടില്ല.

വഖഫ് സ്വത്തുക്കളുടെ ചൂഷണം അവസാനിപ്പിക്കുക ലക്ഷ്യമിട്ട് പാസാക്കിയ നിയമം മൂലം ഇപ്പോള്‍ പലയിടത്തും അക്രമങ്ങള്‍ പൊട്ടിപ്പുറപ്പെട്ടിരിക്കുകയാണ്. മതപരമായ സ്വത്ത് ഇടപാടുകളില്‍ നീതിയും സുതാര്യതയും ഉറപ്പാക്കുന്നതിനുള്ള നീക്കമെന്നാണ് ബിജെപി വഖഫ് ഭേദഗതിയെ വിശേഷിപ്പിച്ചത്.

അക്രമബാധിത പ്രദേശത്ത് നിന്നുള്ള ഒരു ഞെട്ടിക്കുന്ന വീഡിയോ വലിയ രീതിയില്‍ വൈറലായിട്ടുണ്ട്, അതില്‍ മുഖം മറയ്ക്കാതെ ഒരാള്‍ ഹിന്ദുക്കളെ വിമര്‍ശിക്കുന്നത് കേള്‍ക്കാം: 'ഹിന്ദുക്കള്‍ നായ്ക്കളാണ്. ഞങ്ങള്‍ അധികാരത്തില്‍ വന്നാല്‍ അവരെ വേണ്ട രീതിയില്‍ തന്നെ പരിപാലിക്കും' വീഡിയോയില്‍ നിന്ന് വ്യക്തമാവുന്നു.

തീവ്രവാദം നിയന്ത്രണാതീതമായി വളരുന്നതിന്റെ വ്യക്തമായ തെളിവാണിതെന്ന് ബിജെപി കുറ്റപ്പെടുത്തി രംഗത്ത് വന്നിരുന്നു. മുര്‍ഷിദാബാദിലെ അക്രമ സംഭവങ്ങളില്‍ കര്‍ശന നടപടിയെടുക്കണമെന്ന് ബിജെപി ആവശ്യപ്പെടുന്നു.

സുവേന്ദു അധികാരി, സുകാന്ത മജുംദാര്‍, ദിലീപ് ഘോഷ് തുടങ്ങിയ മുതിര്‍ന്ന ബിജെപി നേതാക്കള്‍ കടുത്ത ഭാഷയിലാണ് ഇതിനോട് പ്രതികരിച്ചത്.

തൃണമൂല്‍ കോണ്‍ഗ്രസും മമതയും ഇക്കാര്യത്തില്‍ പ്രതിരോധത്തിലാണ്. ഇതിന് പിന്നാലെയാണ് ബിജെപി ശക്തമായ നടപടികള്‍ ആവശ്യപ്പെട്ടുകൊണ്ട് രംഗത്ത് വന്നിരിക്കുന്നത്. 

മുര്‍ഷിദാബാദിലാണ് വഖഫ് പ്രതിഷേധം പരിധിവിട്ട് വലിയ അക്രമ സംഭവങ്ങളിലേക്ക് തിരിഞ്ഞതെങ്കിലും സമാനമായി രാജ്യത്ത് മറ്റിടങ്ങളിലും പ്രതിഷേധ പ്രകടനങ്ങളും റാലികളും ഒക്കെ നടന്നിരുന്നു. മുംബൈ, ഹൈദരാബാദ്, കൊല്‍ക്കത്ത, പാറ്റ്ന, സില്‍ച്ചാര്‍, ലഖ്നൗ, തമിഴ്നാട്ടിലെ ഹൊസൂര്‍ തുടങ്ങിയ നഗരങ്ങളിലും പ്രതിഷേധങ്ങള്‍ പൊട്ടിപ്പുറപ്പെട്ടു.

അസമിലെ സില്‍ച്ചാറില്‍ ജനക്കൂട്ടം പോലീസുമായി ഏറ്റുമുട്ടിയതോടെ പ്രതിഷേധക്കാര്‍ പ്രകടനങ്ങള്‍ അക്രമാസക്തമായി, സംഭവത്തില്‍ 400-ലധികം പ്രക്ഷോഭകര്‍ ഉള്‍പ്പെട്ടതായി റിപ്പോര്‍ട്ടുകള്‍ വ്യക്തമാക്കുന്നു.

ഡല്‍ഹിയിലെ ജുമാ മസ്ജിദില്‍ നടന്ന പ്രതിഷേധങ്ങള്‍ സമാധാനപരമായി തുടര്‍ന്നെങ്കിലും, ഈ പ്രതിഷേധങ്ങളില്‍ പലതിലെയും ലക്ഷ്യവും മുന്നറിയിപ്പും ഒക്കെ സമാനമാണ്. 

കോണ്‍ഗ്രസ്, ടിഎംസി, എഐഎംഐഎം എന്നീ പാര്‍ട്ടികള്‍ വഖഫ് നിയമത്തെ പാര്‍ലമെന്റിന് അകത്തും പുറത്തും ഒരുപോലെ എതിര്‍ത്തിട്ടുണ്ട്. എന്നാല്‍ തീവ്രവാദികളില്‍ നിന്നുള്ള തുറന്ന വിദ്വേഷ പ്രസംഗങ്ങളെയും അക്രമങ്ങളെയും അപലപിക്കാന്‍ അവര്‍ വിസമ്മതിക്കുന്നത് ഇക്കാര്യത്തില്‍ സംശയത്തിന് ഇടയാക്കുന്നുണ്ട്.

ദേശീയ സുരക്ഷയെ പണയപ്പെടുത്തി പ്രീണന രാഷ്ട്രീയവും വോട്ട് ബാങ്ക് കളികളുമാണ് ഇവര്‍ നടത്തുന്നതെന്ന് ബിജെപി നേതാക്കള്‍ ആരോപിക്കുന്നു.

അതിന് ഏറ്റവും വലിയ ഉദാഹരണമായി ബിജെപി ഉയര്‍ത്തിക്കാട്ടുന്നത് വഖഫ് നിയമത്തിലെ പ്രതിപക്ഷ നിലപാട് തന്നെയാണ്. മുസ്ലീം പ്രീണനം എന്ന ആരോപണം തന്നെയാണ് അവര്‍ മുന്നോട്ട് വയ്ക്കുന്നത്.

ന്യൂനപക്ഷ പ്രീണനത്തിനായി മമത ബാനര്‍ജി ഹിന്ദു സുരക്ഷയില്‍ വിട്ടുവീഴ്ച ചെയ്തുവെന്ന് ബിജെപി നേതാവ് തരുണ്‍ ചുഗ് ആരോപിച്ചു. മമത ബാനര്‍ജിയെ അദ്ദേഹം ആധുനിക ജിന്നയോടാണ് ഉപമിച്ചത്.

മുര്‍ഷിദാബാദില്‍ നടന്ന ആക്രമണ സംഭവങ്ങളില്‍ മൂന്ന് പേര്‍ക്ക് ജീവന്‍ നഷ്ടമായിട്ടും മമത വിഷയത്തില്‍ മൗനം പാലിച്ചതിനെ അദ്ദേഹം വിമര്‍ശിച്ചു. 

ക്ഷേത്രങ്ങള്‍ നശിപ്പിക്കല്‍, നിര്‍ബന്ധിത കുടിയേറ്റം എന്നിവയ്ക്ക് ടിഎംസിയെ കുറ്റപ്പെടുത്തി ഹിന്ദുക്കള്‍ക്കെതിരായ സര്‍ക്കാര്‍ സ്‌പോണ്‍സര്‍ ചെയ്ത അക്രമം എന്നാണ് ബിജെപിയുടെ ഷെഹ്സാദ് പൂനവല്ല ഇതിനെ വിശേഷിപ്പിച്ചത്. 

'ഹിന്ദുക്കള്‍ക്കെതിരായ വിദ്വേഷ പ്രസംഗത്തെ മമത ബാനര്‍ജി എന്തുകൊണ്ട് അപലപിച്ചില്ല? അത് നിശബ്ദതയെ അംഗീകരിക്കുന്നതാണോ?'എന്നാണ് ബിജെപിയുടെ ബംഗാള്‍ ഘടകം ചോദിക്കുന്നത്.

കഴിഞ്ഞ ദിവസങ്ങളില്‍ ഒക്കെയും വിഷയത്തില്‍ കൃത്യമായ നിലപാട് പ്രഖ്യാപിക്കാനോ സ്വീകരിക്കാനോ മമതയ്ക്ക് കഴിഞ്ഞില്ലെന്ന ആക്ഷേപം നിലനില്‍ക്കവെയാണ് പുതിയ നീക്കം.