യുപിഎസ്‌സിക്ക് പകരം ആര്‍എസ്എസ് വഴി റിക്രൂട്ട് ചെയ്ത് നരേന്ദ്ര മോദി ഭരണഘടനയെ ആക്രമിക്കുന്നുവെന്ന് രാഹുല്‍ ഗാന്ധി; സുപ്രധാന സ്ഥാനങ്ങളിലേക്ക് ലാറ്ററല്‍ എന്‍ട്രി വഴിയുള്ള നിയമനം സംവരണത്തിനെതിരെയുള്ള നീക്കമെന്നും വിമര്‍ശനം

ന്യൂഡൽഹി: ഉന്നത പദവികളിലേക്കുള്ള ലാറ്ററൽ പ്രവേശനത്തിനുള്ള ഏറ്റവും പുതിയ നീക്കത്തിലൂടെ കേന്ദ്രസർക്കാർ ഭരണഘടനാ സ്ഥാപനങ്ങളെ തുരങ്കം വയ്ക്കുന്നുവെന്ന് ലോക്‌സഭയിലെ പ്രതിപക്ഷ നേതാവായ രാഹുല്‍ ഗാന്ധി. 

 "യുപിഎസ്‌സിക്ക് പകരം ആർഎസ്എസ് വഴി റിക്രൂട്ട് ചെയ്തുകൊണ്ട് നരേന്ദ്രമോദി ഭരണഘടനയെ ആക്രമിക്കുകയാണ്. ലാറ്ററൽ എൻട്രി വഴി വിവിധ കേന്ദ്ര സർക്കാർ മന്ത്രാലയങ്ങളിലെ സുപ്രധാന സ്ഥാനങ്ങളിലേക്ക് റിക്രൂട്ട് ചെയ്യുന്നതിലൂടെ, എസ്‌സി, എസ്ടി, ഒബിസി വിഭാഗങ്ങൾക്കുള്ള സംവരണം പരസ്യമായി തുരങ്കം വയ്ക്കുകയാണ്''-രാഹുല്‍ ഗാന്ധി 'എക്‌സി'ല്‍ കുറിച്ചു.

പാർശ്വവൽക്കരിക്കപ്പെട്ട സമൂഹങ്ങൾ ഇതിനകം തന്നെ ഉന്നത ഉദ്യോഗസ്ഥ പദവികളിൽ പ്രാതിനിധ്യം കുറഞ്ഞവരാണെന്ന് ചൂണ്ടിക്കാട്ടിയ രാഹുല്‍ ഗാന്ധി, പുതിയ നയം അവർക്ക് അർഹമായ അവസരങ്ങൾ കൂടുതൽ നിഷേധിക്കുമെന്ന് അഭിപ്രായപ്പെട്ടു.

"രാജ്യത്തെ ഉന്നത ബ്യൂറോക്രസിയിലും മറ്റ് ഉന്നത സ്ഥാനങ്ങളിലും അധഃസ്ഥിതർക്ക് പ്രാതിനിധ്യമില്ലെന്ന് ഞാൻ എപ്പോഴും പറഞ്ഞിട്ടുണ്ട്. ഈ പ്രാതിനിധ്യം മെച്ചപ്പെടുത്തുന്നതിന് പകരം ലാറ്ററൽ എൻട്രി അവരെ ഈ ഉന്നത സ്ഥാനങ്ങളിൽ നിന്ന് കൂടുതൽ അകറ്റുകയാണ്," അദ്ദേഹം പറഞ്ഞു.

യുപിഎസ്‌സിക്ക് തയ്യാറെടുക്കുന്ന പ്രതിഭാധനരായ യുവാക്കളുടെ അവകാശങ്ങൾക്ക് നേരെയുള്ള നേരിട്ടുള്ള ആക്രമണമാണിത്, സാമൂഹ്യനീതിയും അധഃസ്ഥിതർക്കുള്ള സംവരണവും എന്ന ആശയത്തിന്മേലുള്ള പ്രഹരമാണിതെന്നും രാഹുല്‍ വിമര്‍ശിച്ചു.

"നിർണ്ണായക സർക്കാർ സ്ഥാനങ്ങളിൽ കോർപ്പറേറ്റ് പ്രതിനിധികൾ എന്തുചെയ്യുമെന്നതിൻ്റെ വ്യക്തമായ ഉദാഹരണം സെബിയാണ്.അവിടെ ചെയര്‍പേഴ്‌സണായി നിയമിച്ചത്‌," അദ്ദേഹം പറഞ്ഞു.

ഭരണ ഘടനയെയും സാമൂഹിക നീതിയെയും ഹനിക്കുന്ന ഈ ദേശവിരുദ്ധ നടപടിയെ ഇന്ത്യാ മുന്നണി ശക്തമായി എതിർക്കും. ഐഎഎസിന്റെ സ്വകാര്യവല്‍ക്കരണമാണ് സംവരണം അവസാനിപ്പിക്കാനുള്ള 'മോദി ഗ്യാരണ്ടി'യെന്നും രാഹുല്‍ പരിഹസിച്ചു.