/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2026/02/26/untitled-2026-02-26-14-22-29.jpg)
ഹൈദരാബാദ്: സാങ്കേതിക തകരാറുകളെത്തുടര്ന്ന് നാസയുടെ ആര്ട്ടെമിസ് II ദൗത്യത്തിനായുള്ള സ്പേസ് ലോഞ്ച് സിസ്റ്റം റോക്കറ്റും ഒറിയോണ് പേടകവും വിക്ഷേപണ തറയില് നിന്ന് തിരികെ മാറ്റി.
ഫ്ലോറിഡയിലെ കെന്നഡി സ്പേസ് സെന്ററിലെ ലോഞ്ച് പാഡ് 39B-യില് നിന്ന് വെഹിക്കിള് അസംബ്ലി ബില്ഡിംഗിലേക്കാണ് ഇവ മാറ്റിയത്. ലിക്വിഡ് ഹൈഡ്രജന് ചോര്ച്ചയെത്തുടര്ന്ന് ആദ്യഘട്ട പരീക്ഷണങ്ങള് തടസ്സപ്പെട്ടതിന് പിന്നാലെയാണ് പുതിയ സാങ്കേതിക പ്രശ്നങ്ങള് കണ്ടെത്തിയത്.
ഫെബ്രുവരി 25-ന് ഇന്ത്യന് സമയം രാത്രി 7:58-നാണ് റോക്കറ്റും പേടകവും മാറ്റുന്ന 'റോള്ബാക്ക്' നടപടികള് ആരംഭിച്ചത്. ഏകദേശം 12 മണിക്കൂര് നീണ്ടുനിന്ന ഈ ദൗത്യത്തിലൂടെ വിക്ഷേപണ തറയില് നിന്ന് 6.4 കിലോമീറ്റര് അകലെയുള്ള ഹാങ്ങറിലേക്ക് ഇവ സുരക്ഷിതമായി എത്തിച്ചു.
ഫെബ്രുവരി 21-ന് റോക്കറ്റിന്റെ മുകള് ഭാഗത്തേക്കുള്ള ഹീലിയം പ്രവാഹത്തില് തടസ്സം നേരിട്ടതായി എഞ്ചിനീയര്മാര് കണ്ടെത്തി. ഫ്ലോറിഡ തീരത്ത് ശക്തമായ കാറ്റിന് സാധ്യതയുള്ളതിനാല് മുന്കരുതല് നടപടിയായാണ് റോക്കറ്റ് മാറ്റാന് തീരുമാനിച്ചത്.
വെഹിക്കിള് അസംബ്ലി ബില്ഡിംഗില് വെച്ച് സാങ്കേതിക വിദഗ്ധര് തകരാറിന്റെ മൂലകാരണം കണ്ടെത്താന് വിശദമായ പരിശോധന നടത്തും.
നേരത്തെ മാര്ച്ച് 6-ന് വിക്ഷേപണം നടത്താനായിരുന്നു നാസ ലക്ഷ്യമിട്ടിരുന്നത്. എന്നാല് പുതിയ തടസ്സങ്ങള് കാരണം ദൗത്യം ഏപ്രിലിലെ വിക്ഷേപണ ജാലകത്തിലേക്ക് മാറ്റിയിരിക്കുകയാണ്. ദൗത്യത്തിന്റെ ഭാഗമായ നാല് ബഹിരാകാശ സഞ്ചാരികളെയും ഫെബ്രുവരി 21-ന് ക്വാറന്റൈനില് നിന്ന് ഒഴിവാക്കി.