സിലിണ്ടർ പൊട്ടിത്തെറിച്ച് അമ്മയ്‌ക്കും മൂന്ന് മക്കൾക്കും ദാരുണാന്ത്യം

ലക്നൗ: സിലിണ്ടർ പൊട്ടിത്തെറിച്ച് മൂന്ന് കുട്ടികളടക്കം നാല് പേർ മരിച്ചു. ഉത്തർപ്രദേശിലെ ഡിയോറിയ ജില്ലയിലാണ് സംഭവം. മരിച്ചവരെല്ലാം കുടുംബാംഗങ്ങളാണ്. പൊലീസും ഫോറൻസിക് ഉദ്യോ​ഗസ്ഥരും സ്ഥലത്തെത്തി പരിശോധന നടത്തി.

ഭക്ഷണം തയ്യാറാക്കുന്നതിനിടെ ഉ​ഗ്ര ശബ്ദത്തോടെ സിലിണ്ടർ പൊട്ടിത്തെറിക്കുകയായിരുന്നു. ഉടൻ തന്നെ അ​ഗ്നിശമന സേന സ്ഥലത്തെത്തി തീയണക്കാനുള്ള ശ്രമങ്ങൾ തുടങ്ങിയിരുന്നു. മണിക്കൂറുകൾ നീണ്ട പരിശ്രമത്തിനൊടുവിലാണ് തീ നിയന്ത്രണ വിധേയമാക്കിയത്.

സ്ഫോടനത്തിൽ വീട് ഭാ​ഗികമായി കത്തി നശിച്ചിട്ടുണ്ട്. അതേസമയം, സിലിണ്ടർ പൊട്ടിത്തെറിക്കാനുള്ള കാരണം വ്യക്തമല്ല. തുടർ നടപടികൾ പുരോ​ഗമിക്കുകയാണെന്ന് പൊലീസ് അറിയിച്ചു.