നവി മുംബൈ അന്താരാഷ്ട്ര വിമാനത്താവളത്തിന് ഡി ബി പാട്ടീലിന്റെ പേര് നൽകുമെന്ന് മുഖ്യമന്ത്രി ദേവേന്ദ്ര ഫഡ്‌നാവിസ്

മുംബൈ: നവി മുംബൈ അന്താരാഷ്ട്ര വിമാനത്താവളത്തിന് ജനകീയ നേതാവായ അന്തരിച്ച ഡി.ബി. പാട്ടീലിന്റെ പേരാണ് നല്‍കുകയെന്ന് മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ്. പ്രദേശത്തിന്റെ സാമ്പത്തിക വികാസത്തില്‍ വിമാനത്താവളം നിര്‍ണായക പങ്ക് വഹിക്കുമെന്ന് അദ്ദേഹം പറഞ്ഞു. 

നവി മുംബൈ മുനിസിപ്പല്‍ കോര്‍പ്പറേഷന്‍ തിരഞ്ഞെടുപ്പ് പ്രചാരണ വേളയില്‍ ഐറോളിയില്‍ നടന്ന പൊതുയോഗത്തില്‍ സംസാരിക്കവെ, 'നവി മുംബൈയില്‍ ആരംഭിച്ച അന്താരാഷ്ട്ര വിമാനത്താവളത്തിന് ജനകീയ നേതാവ് അന്തരിച്ച ഡി.ബി. പാട്ടീലിന്റെ പേരാണ് നല്‍കുകയെന്ന്' ഫഡ്നാവിസ് പറഞ്ഞു. പദ്ധതി ഒന്നിലധികം മേഖലകളിലെ വളര്‍ച്ചയെ ശക്തിപ്പെടുത്തുമെന്നും അദ്ദേഹം കൂട്ടിച്ചേര്‍ത്തു.

നവി മുംബൈയെ മുംബൈയുടെ ഒരു വിപുലീകരണമായി വിശേഷിപ്പിച്ച മുഖ്യമന്ത്രി, സാമ്പത്തിക വളര്‍ച്ചയുടെ അടുത്ത എഞ്ചിനായി ഇത് ഉയര്‍ന്നുവരുമെന്ന് പറഞ്ഞു.

വിമാനത്താവളം ഫാര്‍മസ്യൂട്ടിക്കല്‍സ്, ഇന്നൊവേഷന്‍, ഭക്ഷ്യ സംസ്‌കരണം, സേവനങ്ങള്‍, ഇറക്കുമതി-കയറ്റുമതി തുടങ്ങിയ വ്യവസായങ്ങളെ ഉത്തേജിപ്പിക്കുമെന്നും നഗരത്തിന്റെ സാമ്പത്തിക അടിത്തറ വിശാലമാക്കാന്‍ സഹായിക്കുമെന്നും അദ്ദേഹം കൂട്ടിച്ചേര്‍ത്തു.

'ഗതാഗതക്കുരുക്ക് പരിഹരിക്കുന്നതിനായി വിവിധ അടിസ്ഥാന സൗകര്യ പദ്ധതികള്‍ പുരോഗമിക്കുകയാണ്. കലംബോളിയിലെ പുതിയ ജംഗ്ഷനും ഖാര്‍ഘര്‍-തുര്‍ബെ തുരങ്കവും ഇതില്‍ ഉള്‍പ്പെടുന്നു. നഗരത്തിലുടനീളമുള്ള കണക്റ്റിവിറ്റി മെച്ചപ്പെടുത്തുന്നതിനായി സിഡ്‌കോ വഴി ഒരു മെട്രോ ശൃംഖല വികസിപ്പിച്ചുകൊണ്ടിരിക്കുകയാണ്,' അദ്ദേഹം പറഞ്ഞു.

കൂടാതെ, ഷിലാര്‍, പോഷിര്‍ പദ്ധതികള്‍ വരും ദിവസങ്ങളില്‍ നഗരത്തിലെ കുടിവെള്ള ആവശ്യങ്ങള്‍ പരിഹരിക്കുമെന്ന് മുഖ്യമന്ത്രി പറഞ്ഞു.

ലോകമെമ്പാടുമുള്ള പ്രമുഖ സര്‍വകലാശാലകളെ ആകര്‍ഷിക്കുകയും പ്രാദേശിക വിദ്യാര്‍ത്ഥികള്‍ക്ക് വിദ്യാഭ്യാസ, തൊഴിലവസരങ്ങള്‍ സൃഷ്ടിക്കുകയും ചെയ്യുന്ന ഒരു എഡ്യൂസിറ്റി നവി മുംബൈയില്‍ വികസിപ്പിക്കാനുള്ള പദ്ധതികളും അദ്ദേഹം പ്രഖ്യാപിച്ചു.