പുതുവത്സരാഘോഷത്തിന് മുന്നോടിയായി ഡൽഹി പോലീസ് നടത്തിയ വ്യാപക റെയ്ഡിൽ 150 പേർ അറസ്റ്റിൽ, 40 ആയുധങ്ങളും മയക്കുമരുന്നുകളും പിടിച്ചെടുത്തു

ഡല്‍ഹി: പുതുവത്സരാഘോഷത്തിന് മുന്നോടിയായി, തെക്കുകിഴക്കന്‍ ജില്ലയില്‍ സംഘടിത കുറ്റകൃത്യങ്ങള്‍ക്കെതിരെ ഡല്‍ഹി പോലീസ് വന്‍ നടപടി സ്വീകരിച്ചു.

 'ഓപ്പറേഷന്‍ ആഘത്' എന്ന പേരില്‍, ജില്ലയിലുടനീളം രാത്രി മുഴുവന്‍ പോലീസ് റെയ്ഡുകള്‍ നടത്തി, 150 പേരെ അറസ്റ്റ് ചെയ്തു.

ഈ ഓപ്പറേഷനില്‍ 40 ലധികം ആയുധങ്ങളും ലക്ഷക്കണക്കിന് രൂപയുടെ പണവും കണ്ടെടുത്തു. പ്രദേശത്ത് പ്രവര്‍ത്തിക്കുന്ന സംഘടിത ക്രിമിനല്‍ ശൃംഖലകളെ തകര്‍ക്കുക എന്ന ലക്ഷ്യത്തോടെയാണ് നടപടിയെന്ന് പോലീസ് ഉദ്യോഗസ്ഥര്‍ പറഞ്ഞു.

പരിശോധനയുടെ ഭാഗമായി ഏകദേശം 1000 പേരെ ചോദ്യം ചെയ്യുന്നതിനായി കസ്റ്റഡിയിലെടുത്തു. നിരവധി സ്ഥലങ്ങളില്‍ നിന്ന് മയക്കുമരുന്നുകളും അനധികൃത മദ്യവും കണ്ടെടുക്കുന്നതിനും റെയ്ഡുകള്‍ സഹായിച്ചു.

തെക്ക് കിഴക്കന്‍ ജില്ലയിലെ നിരവധി ഹോട്ട്സ്പോട്ടുകളില്‍ രാത്രിയില്‍ നടത്തിയ പരിശോധന, പുതുവത്സരാഘോഷങ്ങള്‍ക്ക് മുന്നോടിയായി പൊതുജന സുരക്ഷ ഉറപ്പാക്കുന്നതിനും കുറ്റകൃത്യങ്ങള്‍ തടയുന്നതിനുമായി വരും ദിവസങ്ങളിലും തുടരുമെന്ന് മുതിര്‍ന്ന പോലീസ് ഉദ്യോഗസ്ഥര്‍ പറഞ്ഞു