വിശാഖപട്ടണം നാവിക ചാരവൃത്തി കേസിൽ എൻഐഎ പ്രത്യേക കോടതി രണ്ട് പേർക്ക് കൂടി ശിക്ഷ വിധിച്ചു, ഉന്നതതല അന്വേഷണത്തിൽ ആകെ കുറ്റക്കാരുടെ എണ്ണം നാലായി

ഡല്‍ഹി: വിശാഖപട്ടണം നാവിക ചാരവൃത്തി കേസില്‍ രണ്ട് പ്രതികള്‍ക്ക് കൂടി ദേശീയ അന്വേഷണ ഏജന്‍സി (എന്‍ഐഎ) പ്രത്യേക കോടതി ശിക്ഷ വിധിച്ചു. ഇതോടെ ഇതുവരെയുള്ള ആകെ ശിക്ഷിക്കപ്പെട്ടവരുടെ എണ്ണം നാലായി. കേന്ദ്ര ഏജന്‍സിയുടെ പ്രസ്താവനയില്‍ പറയുന്നു.

വിശാഖപട്ടണത്തെ പ്രത്യേക കോടതി മുംബൈ സ്വദേശിയായ മുഹമ്മദ് ഹാരൂണ്‍ ഹാജി അബ്ദുള്‍ റഹ്‌മാന്‍ ലക്ഡാവാലയെ യുഎ(പി) നിയമത്തിലെ 17, 18 വകുപ്പുകള്‍ പ്രകാരം അഞ്ചര വര്‍ഷത്തെ ലളിതമായ തടവിന് (എസ്ഐ) ശിക്ഷിച്ചു.

ഗുജറാത്ത് സ്വദേശിയായ ഗോധ്രയിലെ ഇമ്രാന്‍ യാക്കൂബ് ഗിലെറ്റിക്ക് ഇതേ കുറ്റങ്ങള്‍ക്ക് ഓരോന്നിനും ആറ് വര്‍ഷം വീതം എസ്ഐ ശിക്ഷ വിധിച്ചു.

പ്രതികള്‍ക്ക് 5000 രൂപ വീതം പിഴയും, പിഴ അടയ്ക്കുന്നതില്‍ വീഴ്ച വരുത്തിയാല്‍ ഒരു വര്‍ഷം കൂടി തടവ് അനുഭവിക്കേണ്ടിവരുമെന്ന് പ്രസ്താവനയില്‍ പറയുന്നു.

രാജ്യത്ത് പ്രവര്‍ത്തിക്കുന്ന വിദേശ ചാരന്മാരോ ഏജന്റുമാരോ ചേര്‍ന്ന് സുപ്രധാന സ്ഥാപനങ്ങളിലും ഇന്ത്യന്‍ നാവികസേനയുടെ സ്ഥാപനങ്ങളിലും നടത്തിയ ചാരപ്രവര്‍ത്തനങ്ങളുമായി ബന്ധപ്പെട്ടതാണ് കേസ്.