2008 ലെ മുംബൈ ഭീകരാക്രമണ സൂത്രധാരൻ തഹാവൂർ ഹുസൈൻ റാണയുമായി ഡേവിഡ് കോൾമാൻ ഹെഡ്‌ലി ബന്ധപ്പെട്ടിരുന്നു. ആക്രമണത്തിന് മുമ്പ് 231 തവണ ഇരുവരും സംസാരിച്ചിരുന്നതായി എന്‍ഐഎ

മുംബൈ: 2008 ലെ മുംബൈ ഭീകരാക്രമണ സൂത്രധാരൻ തഹാവൂർ ഹുസൈൻ റാണയുമായി പാകിസ്ഥാൻ-അമേരിക്കൻ ഭീകരൻ ഡേവിഡ് കോൾമാൻ ഹെഡ്‌ലി ബന്ധപ്പെട്ടിരുന്നുവെന്ന് എൻ ഐ എ.

ആക്രമണത്തിന് മുമ്പ് ഇന്ത്യയിലേക്കുള്ള എട്ട് സന്ദർശനങ്ങളിലായി 231 തവണ ഇരുവരും വിളിച്ചിരുന്നുവെന്നും എൻ‌ഐ‌എ പറഞ്ഞു.

2006 സെപ്റ്റംബർ 14 ന്, ഇന്ത്യയിലേക്കുള്ള ആദ്യ സന്ദർശന വേളയിൽ, ഹെഡ്‌ലി റാണയെ 32 തവണയിൽ കൂടുതൽ വിളിച്ചു. പാകിസ്ഥാൻ വംശജനായ കനേഡിയൻ പൗരനായ റാണ, 166 പേരുടെ മരണത്തിന് കാരണമായ 26/11 ആക്രമണത്തിന്റെ പ്രധാന ഗൂഢാലോചനക്കാരിൽ ഒരാളായ ഹെഡ്‌ലിയുമായി അടുത്ത് പ്രവർത്തിച്ചിരുന്നു.

എൻ‌ഐ‌എ രേഖ പ്രകാരം, ഹെഡ്‌ലി റാണയെ രണ്ടാമത്തെ സന്ദർശനത്തിൽ 23 തവണയും, മൂന്നാമത്തെ സന്ദർശനത്തിൽ 40 തവണയും, അഞ്ചാമത്തെ സന്ദർശനത്തിൽ 37 തവണയും, ആറാമത്തെ സന്ദർശനത്തിൽ 33 തവണയും, എട്ടാമത്തെ സന്ദർശനത്തിൽ 66 തവണയും വിളിച്ചു.