ആയുഷ് ഡോക്ടര്‍മാര്‍ക്കുള്ള നിയമന കത്ത് വിതരണ ചടങ്ങിനിടെ മുസ്ലീം വനിതാ ഡോക്ടറുടെ ഹിജാബ് ഊരിമാറ്റാന്‍ ശ്രമിച്ച് നിതീഷ് കുമാര്‍. ബീഹാർ മുഖ്യമന്ത്രിയുടെ മാനസികാവസ്ഥയെ ചോദ്യം ചെയ്ത് പ്രതിപക്ഷം

പട്‌ന: തിങ്കളാഴ്ച നടന്ന ഒരു ഔദ്യോഗിക ചടങ്ങിനിടെ ബീഹാര്‍ മുഖ്യമന്ത്രി നിതീഷ് കുമാറിന്റെ പെരുമാറ്റം വീണ്ടും വിവാദത്തിന് തിരികൊളുത്തി. പുതുതായി നിയമിതരായ ആയുഷ് ഡോക്ടര്‍മാര്‍ക്കുള്ള നിയമന കത്ത് വിതരണ ചടങ്ങിനിടെയാണ് സംഭവം.

ഒരു മുസ്ലീം വനിതാ ഡോക്ടറുടെ ഹിജാബ് ഊരിമാറ്റാന്‍ കുമാര്‍ ശ്രമിച്ചത് ദൃശ്യങ്ങളില്‍ കാണാം.  ഉപമുഖ്യമന്ത്രിമാരായ സാമ്രാട്ട് ചൗധരി, വിജയ് കുമാര്‍ സിന്‍ഹ, ബീഹാര്‍ സര്‍ക്കാര്‍ മന്ത്രിമാരായ വിജയ് കുമാര്‍ ചൗധരി, ആരോഗ്യമന്ത്രി മംഗള്‍ പാണ്ഡെ എന്നിവരും ചടങ്ങില്‍ പങ്കെടുത്തു.

സോഷ്യല്‍ മീഡിയയില്‍ വൈറലായ ഒരു വീഡിയോ പ്രതിപക്ഷ പാര്‍ട്ടികളുടെ രൂക്ഷ വിമര്‍ശനത്തിനും ഓണ്‍ലൈന്‍ ഉപയോക്താക്കള്‍ക്കിടയില്‍ വ്യാപകമായ പ്രതിഷേധത്തിനും ഇടയാക്കി.

ദൃശ്യങ്ങളില്‍, നിതീഷ് കുമാര്‍ സ്ത്രീക്ക് നിയമന കത്ത് നല്‍കുന്നതും, അവരുടെ ശിരോവസ്ത്രത്തിനെക്കുറിച്ച് ചോദ്യം ചെയ്യുന്നതും, അത് നീക്കം ചെയ്യാന്‍ ആവശ്യപ്പെടുന്നതും കാണാം. നിമിഷങ്ങള്‍ക്കുശേഷം, അദ്ദേഹം തന്നെ അത് വലിച്ചു താഴ്ത്തുന്നു.

മുഖ്യമന്ത്രിയുടെ സെക്രട്ടേറിയറ്റായ 'സംവാദ്' എന്ന സ്ഥലത്താണ് പരിപാടി നടന്നത്. ആയിരത്തിലധികം ആയുഷ് ഡോക്ടര്‍മാര്‍ക്ക് നിയമന കത്തുകള്‍ വിതരണം ചെയ്തു. മുഖം മറച്ച ഹിജാബ് ധരിച്ച് എത്തിയ നുസ്രത്ത് പര്‍വീന്റെ ഊഴമായപ്പോള്‍, മുഖ്യമന്ത്രി മുഖം ചുളിച്ച് 'ഇത് എന്താണ്?' എന്ന് ചോദിക്കുകയായിരുന്നു.