നോയിഡയിൽ അഴുക്കുചാലിലെ ടാങ്ക് വൃത്തിയാക്കുന്നതിനിടെ രണ്ട് ശുചീകരണ തൊഴിലാളികൾ വീണു മരിച്ചു, കരാറുകാരെ പോലീസ് അറസ്റ്റ് ചെയ്തു

നോയിഡ: നോയിഡ അതോറിറ്റിയിലെ മലിനജല ടാങ്ക് വൃത്തിയാക്കുന്നതിനിടെ ശുചിത്വ തൊഴിലാളികളായ രണ്ട് പേര്‍ മരിച്ചു. ശനിയാഴ്ച വൈകുന്നേരം ഒരു കരാറുകാരന്റെ നിര്‍ദ്ദേശപ്രകാരം സെക്ടര്‍ 115 ലെ മലിനജല പമ്പിംഗ് സ്റ്റേഷനിലെ 25 അടി ആഴമുള്ള ടാങ്ക് വൃത്തിയാക്കുകയായിരുന്നു രണ്ട് പേരും.

സുരക്ഷാ ഉപകരണങ്ങളുടെ അഭാവം മൂലം ഇരുവരും ടാങ്കില്‍ ബോധരഹിതരായി വീണ് മരിച്ച നിലയില്‍ ടാങ്കില്‍ നിന്ന് പുറത്തെടുത്തെന്നുമാണ് ബന്ധുക്കള്‍ ആരോപിക്കുന്നത്. ബന്ധുക്കളുടെ പരാതിയില്‍ പോലീസ് രണ്ട് കരാറുകാരെയും അറസ്റ്റ് ചെയ്ത് ജയിലിലടച്ചു.

അലിഗഡിലെ മഹുഖേദ ഗ്രാമത്തില്‍ താമസിക്കുന്ന വികാസും കസിന്‍ ഖുശാലും ശുചീകരണ തൊഴിലാളികളായിരുന്നു.

ഇരുവരും സെക്ടര്‍ 49 ലെ ബറോള ഗ്രാമത്തില്‍ വാടകയ്ക്ക് കുടുംബത്തോടൊപ്പം താമസിച്ചിരുന്നു. ഇരുവരും കരാറുകാരായ പുഷ്‌പേന്ദ്രയുടെയും അജിത്തിന്റെയും കീഴില്‍ മലിനജല ടാങ്ക്, ഡ്രെയിന്‍ ക്ലീനര്‍മാരായി ജോലി ചെയ്തിരുന്നു.

കുടുംബം പറയുന്നതനുസരിച്ച്, ശനിയാഴ്ച ഉച്ചകഴിഞ്ഞ്, കോണ്‍ട്രാക്ടര്‍ പുഷ്‌പേന്ദ്ര ഇരുവരെയും സെക്ടര്‍ 115 ലെ മലിനജല പമ്പിംഗ് സ്റ്റേഷനിലേക്ക് വിളിച്ചുവരുത്തി. മലിനജല ടാങ്ക് വൃത്തിയാക്കാന്‍ അദ്ദേഹം ആവശ്യപ്പെട്ടു. സുരക്ഷാ ഉപകരണങ്ങളൊന്നുമില്ലാതെ ഇരുവരും ടാങ്കില്‍ ഇറങ്ങി ജോലി ആരംഭിച്ചു.

ടാങ്കിനുള്ളില്‍ ചൂടും വാതക രൂപീകരണവും കാരണം ഇരുവരും ബോധരഹിതരായി ടാങ്കിലേക്ക് വീണു. സമീപത്ത് ജോലി ചെയ്തിരുന്ന ജീവനക്കാര്‍ കോണ്‍ട്രാക്ടറെയും ബന്ധുക്കളെയും പോലീസിനെയും വിവരം അറിയിച്ചു.

പോലീസ് സ്ഥലത്തെത്തി ഏറെ നേരത്തെ പരിശ്രമത്തിനൊടുവില്‍ ഇരുവരെയും പുറത്തെടുത്തു. ആശുപത്രിയിലെത്തിച്ചപ്പോള്‍ ഡോക്ടര്‍മാര്‍ ഇരുവരും മരിച്ചതായി പ്രഖ്യാപിച്ചു. വിവരം ലഭിച്ചയുടനെ ബന്ധുക്കളും അവിടെയെത്തി.

യാതൊരു മാനദണ്ഡങ്ങളുമില്ലാതെയാണ് കരാറുകാരന്‍ ജോലി ചെയ്യുന്നതെന്ന് ഖുഷാലിന്റെ സഹോദരന്‍ ബ്രിജേഷ് കുമാര്‍ പറഞ്ഞു. കയറുകള്‍ കെട്ടാതെയാണ് കരാറുകാരന്‍ തൊഴിലാളികളെ മലിനജല ടാങ്ക് വൃത്തിയാക്കാന്‍ അയച്ചതെന്ന് ആരോപണമുണ്ട്.