രാജ്യത്തെ പ്രമുഖ ആണവ ഗവേഷണ യൂണിറ്റായ ഭാഭ ആറ്റോമിക് റിസര്‍ച്ച് സെന്ററില്‍ നിന്നും വ്യാജ ശാസ്ത്രജ്ഞനെ അറസ്റ്റ് ചെയ്തു. സംശയാസ്പദമായ ആണവ ഡാറ്റയും 14 ഭൂപടങ്ങളും കണ്ടെടുത്തു

മുംബൈ: രാജ്യത്തെ പ്രമുഖ ആണവ ഗവേഷണ യൂണിറ്റായ ഭാഭ ആറ്റോമിക് റിസര്‍ച്ച് സെന്ററിലെ വ്യാജ ശാസ്ത്രജ്ഞനെ അറസ്റ്റ് ചെയ്തു.

സംശയാസ്പദമായ ആണവ ഡാറ്റയും 14 ഭൂപടങ്ങളും മുംബൈ പോലീസ് പ്രതിയില്‍ നിന്ന് കണ്ടെടുത്തു. സെന്‍സിറ്റീവ് ആയ ആണവ വിവരങ്ങള്‍ അവയില്‍ അടങ്ങിയിട്ടുണ്ടോ എന്ന് നിര്‍ണ്ണയിക്കാന്‍ ഈ രേഖകള്‍ ഇപ്പോള്‍ പരിശോധിച്ചുവരികയാണ്.

കഴിഞ്ഞയാഴ്ച വെര്‍സോവയില്‍ വെച്ചാണ് അക്തര്‍ ഖുതുബുദ്ദീന്‍ ഹുസൈനി അറസ്റ്റിലായത്. ശാസ്ത്രജ്ഞനായി വേഷം കെട്ടിയ ഇയാള്‍ പല പേരുകളിലാണ് അറിയപ്പെട്ടിരുന്നത്.

നിരവധി വ്യാജ പാസ്പോര്‍ട്ടുകള്‍, ആധാര്‍, പാന്‍ കാര്‍ഡുകള്‍, വ്യാജ ബിഎആര്‍സി ഐഡികള്‍ എന്നിവയും ഇയാളില്‍ നിന്ന് കണ്ടെടുത്തു. ഒരു ഐഡിയില്‍ അലി റാസ ഹുസൈന്‍ എന്നും മറ്റൊന്നില്‍ അലക്‌സാണ്ടര്‍ പാമര്‍ എന്നുമാണ് രേഖപ്പെടുത്തിയിരിക്കുന്നത്.

കഴിഞ്ഞ കുറച്ച് മാസങ്ങളായി ഹുസൈനി നിരവധി അന്താരാഷ്ട്ര കോളുകള്‍ നടത്തിയിട്ടുണ്ടെന്ന് വൃത്തങ്ങള്‍ സൂചിപ്പിക്കുന്നു.

കോള്‍ റെക്കോര്‍ഡുകള്‍ ഇപ്പോള്‍ പരിശോധിച്ചുവരികയാണ്. സംശയിക്കപ്പെടുന്ന ആണവ ഡാറ്റയുമായി ബന്ധപ്പെടുത്താവുന്ന വിദേശ നെറ്റ്വര്‍ക്കുകളുമായി അയാള്‍ ബന്ധപ്പെട്ടിരുന്നതായി പോലീസ് സംശയിക്കുന്നു.