ബംഗ്ലാദേശ് പ്രധാനമന്ത്രി താരിഖ് റഹ്മാനുമായി കൂടിക്കാഴ്ച നടത്തി ഓം ബിർള; ഇന്ത്യയിലേക്ക് ക്ഷണം

ഡല്‍ഹി: ബംഗ്ലാദേശിന്റെ പുതിയ പ്രധാനമന്ത്രിയായി സത്യപ്രതിജ്ഞ ചെയ്ത താരിഖ് റഹ്‌മാനുമായി ലോക്സഭാ സ്പീക്കര്‍ ഓം ബിര്‍ള കൂടിക്കാഴ്ച നടത്തി.

ബംഗ്ലാദേശ് നാഷണലിസ്റ്റ് പാര്‍ട്ടി സര്‍ക്കാര്‍ രൂപീകരിച്ച പശ്ചാത്തലത്തില്‍ ഇന്ത്യയുടെ ഔദ്യോഗിക ആശംസകള്‍ അദ്ദേഹം അറിയിച്ചതായി ന്യൂഡല്‍ഹിയിലെ ബംഗ്ലാദേശ് പ്രതിനിധി വ്യക്തമാക്കി.

ധാക്കയില്‍ നടന്ന സത്യപ്രതിജ്ഞാ ചടങ്ങിന് പിന്നാലെയായിരുന്നു ഈ സൗഹൃദ കൂടിക്കാഴ്ച. പ്രധാനമന്ത്രി താരിഖ് റഹ്‌മാനെ ഓം ബിര്‍ള ഇന്ത്യ സന്ദര്‍ശിക്കാന്‍ ക്ഷണിച്ചു. ബംഗ്ലാദേശിലെ രാഷ്ട്രീയ മാറ്റത്തിന് ശേഷവും ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ശക്തമായി തുടരുന്നതിന്റെ സൂചനയാണിത്.

ഇരു നേതാക്കളും തങ്ങളുടെ സര്‍ക്കാരുകള്‍ക്ക് വേണ്ടി പരസ്പരം ആശംസകള്‍ കൈമാറി. ജനക്ഷേമത്തില്‍ അധിഷ്ഠിതമായ സഹകരണത്തിലൂടെ ഇരു രാജ്യങ്ങളിലെയും ജനങ്ങള്‍ക്കായി ഒരുമിച്ച് പ്രവര്‍ത്തിക്കുമെന്ന് നേതാക്കള്‍ പ്രത്യാശ പ്രകടിപ്പിച്ചു.

ഇരുരാജ്യങ്ങളും തമ്മിലുള്ള ബന്ധത്തില്‍ വലിയ ശുഭാപ്തിവിശ്വാസമുണ്ടെന്ന് ഇന്ത്യയിലെ ബംഗ്ലാദേശ് ഹൈക്കമ്മീഷണര്‍ റിയാസ് ഹമീദുള്ള പറഞ്ഞു.

ബംഗ്ലാദേശിലെ ഭരണമാറ്റത്തിന് ശേഷം ഇന്ത്യ നടത്തുന്ന നിര്‍ണ്ണായകമായ നയതന്ത്ര നീക്കങ്ങളിലൊന്നായാണ് ഈ കൂടിക്കാഴ്ച വിലയിരുത്തപ്പെടുന്നത്.