ഒസാമ ബിൻ ലാദന്റെ പ്രസംഗങ്ങൾ സൂക്ഷിച്ചിരുന്നതായി ആരോപിച്ച് പുണെയിൽ ടെക്കി അറസ്റ്റിൽ

ഡല്‍ഹി: അല്‍-ഖ്വയ്ദയുമായി ബന്ധം ആരോപിച്ച് പൂനെയില്‍ മഹാരാഷ്ട്ര ഭീകരവിരുദ്ധ സ്‌ക്വാഡ് (എടിഎസ്) അറസ്റ്റ് ചെയ്ത ഒരു സോഫ്റ്റ്വെയര്‍ എഞ്ചിനീയര്‍ ഭീകര സംഘടനയുടെ സ്ഥാപകന്‍ ഒസാമ ബിന്‍ ലാദന്റെ പ്രസംഗങ്ങള്‍ പിന്തുടര്‍ന്നതായി ആരോപിക്കപ്പെടുന്നു.

തിങ്കളാഴ്ച മഹാരാഷ്ട്രയിലെ ഭീകരവിരുദ്ധ സ്‌ക്വാഡ് സുബര്‍ ഹംഗാര്‍ഗേക്കറെ അറസ്റ്റ് ചെയ്തതിന് ശേഷം ഇയാളുടെ കൈവശം കണ്ടെടുത്ത വസ്തുക്കളില്‍ ബിന്‍ ലാദന്റെ പ്രസംഗത്തിന്റെ ഉറുദു പരിഭാഷയും ഉള്‍പ്പെട്ടിട്ടുണ്ടെന്ന് വൃത്തങ്ങള്‍ അറിയിച്ചു. 

ഹംഗാര്‍ഗേക്കര്‍ എകെ 47 റൈഫിള്‍ ഉപയോഗിക്കുകയും ബോംബുകള്‍ നിര്‍മ്മിക്കുകയും ചെയ്യുന്നതിന്റെ ഫോട്ടോകളും ഇയാളില്‍ നിന്ന് പിടിച്ചെടുത്തിട്ടുണ്ട്.

യുവാക്കളെ തീവ്രവാദത്തിലേക്ക് നയിക്കുന്നതില്‍ ഇയാളുടെ പങ്ക് കണ്ടെത്താനുള്ള ശ്രമങ്ങള്‍ പുരോഗമിക്കുകയാണെന്ന് വൃത്തങ്ങള്‍ കൂട്ടിച്ചേര്‍ത്തു.

കഴിഞ്ഞ മാസം മുതല്‍ എ.ടി.എസിന്റെ നിരീക്ഷണത്തിലായിരുന്ന ഹംഗാര്‍ഗേക്കറെ നിയമവിരുദ്ധ പ്രവര്‍ത്തനങ്ങള്‍ (തടയല്‍) നിയമത്തിലെ വകുപ്പുകള്‍ പ്രകാരം കോണ്ട്വ പ്രദേശത്ത് നിന്ന് അറസ്റ്റ് ചെയ്തു. പ്രത്യേക യു.എ.പി.എ കോടതി നവംബര്‍ 4 വരെ പോലീസ് കസ്റ്റഡിയില്‍ വിട്ടു.